Boston Dynamics Robotu Artıq Ev İşlərini Görə Bilər!

Massaçusets şirkəti Boston Dynamics, Toyota Araşdırma İnstitutu (TRI) ilə əməkdaşlıq nəticəsində insanabənzər robotu Atlası yeni bir mərhələyə keçirdi. Atlas indi "Böyük Davranış Modeli" (LBM) adlanan, insan hərəkətlərinin nəhəng məlumat bazasında təlim keçmiş mürəkkəb süni intellekt sistemi ilə idarə olunur.

Bu yeni "beyin" robota yalnız nə edəcəyini deyil, gözlənilməz vəziyyətlərlə necə mübarizə aparacağını da öyrədir. Yayımlanan videoda ən diqqət çəkən hissə, Atlasın səbr sınağı ilə üzləşməsidir. Robota müəyyən əşyaları qutuya qoymaq tapşırığı verilir. Məkrli bir həmkar kimi davranan mühəndis dəfələrlə qutunun qapağını bağlayır və onu başqa yerə itələyir.

Əvvəlki robot sistemləri bu cür müdaxilə ilə qarşılaşdıqda donub qala bilərdi və ya işləməyi dayandıra bilərdi. Ancaq Atlas təəccüblü şəkildə vəziyyəti təhlil etdi. Sakitcə mövqeyini düzəltdi, qutunu tapdı və qapağını açdı. Sonra tapşırığını davam etdirdi. Bu səhnə robotun yalnız proqramlaşdırılmış əmrləri yerinə yetirmək qabiliyyətinə yox, həm də dəyişən şəraitə dinamik uyğunlaşmaq qabiliyyətinə sahib olduğunu göstərdi.

Boston Dynamics, açıqlamada LBM-lərdə ən böyük inqilabın robotlara bir sətir kod yazmadan yeni imkanlar əlavə etmək qabiliyyəti olduğunu bildirdi. Bu o deməkdir ki, əvvəllər aylarca proqramlaşdırma tələb edən işlər indi süni intellektin öyrənmə qabiliyyəti ilə əvəz olunacaq.

Boston Dynamics-də Robotok Araşdırmaları üzrə Baş vitse-prezidenti Scott Kuindersma deyib: "Bu iş ümumi məqsədli robotlar haqqında vizyonumuzun pəncərəsini açır və bu robotlar həyat və iş tərzimizi dəyişəcəkdir". Kuindersma vurğulayıb ki, bu yanaşma Atlas kimi yüksək qabiliyyətli robotların güc və dəqiqlik tələb edən tapşırıqlar üçün məlumat toplamağını asanlaşdıracaq və inkişafı sürətləndirəcəkdir.

Sürətlə inkişaf edən robot texnologiyası paltar yığmaqdan fabrik montajına qədər müxtəlif tapşırıqları yerinə yetirə bilən daha çevik, ağıllı və uyğunlaşa bilən insanabənzər robotların gəlişinin artıq uzaq bir xəyal olmadığını sübut edir.