Apple və Formula 1 Beş İllik Eksklüziv Yayım Müqaviləsi Bağladı: 2026-cı ildən Bütün Yarışlar Apple TV-də

Apple TV abunəçiləri bütün məşq, təsnifat, Sprint sessiyaları və Qran Pri yarışlarını izləyə biləcəklər. Apple bildirir ki, mövsüm ərzində seçilmiş bəzi yarışlar və bütün məşq sessiyaları Apple TV tətbiqində pulsuz yayımlanacaq.

Məlumata görə, Apple bu hüquqlar üçün illik 140-150 milyon dollar təklif edib. Bu məbləğ ESPN-in F1 üçün hazırda ödəyəcəyi illik 85 milyon dollardan xeyli çoxdur. Beş illik müqavilənin ümumi dəyəri təxminən 750 milyon dollar civarındadır.

Bu addım Apple-ın bir neçə gün əvvəl yayım xidmətinin adını "Apple TV+"-dan sadəcə "Apple TV"-yə dəyişməsindən sonra atılır. Həmçinin, bu hadisə Apple-ın Formula 1 ilə birgə əməkdaşlığı nəticəsində ərsəyə gələn və baş rolda Bred Pittin oynadığı "F1 Filmi"ndən sonra baş verir. Həmin film bu il dünya üzrə 629 milyon dollar gəlir gətirərək, tarixin ən çox gəlir gətirən idman filmi olmuşdu. Film dekabrın 12-də Apple TV-də nümayiş olunacaq.

Apple bildirir ki, Formula 1-i yayımlamaqla yanaşı, bu idman növü Apple News, Apple Maps, Apple Music və Apple Fitness+ tətbiqləri vasitəsilə də genişləndiriləcək. Üstəlik, Apple Sports tətbiqi mövsüm boyu hər Qran Pri üçün canlı yenilənmələr, real vaxt rejimində reytinq cədvəlləri, sürücü və komanda sıralamaları, Kilid Ekranında izləmək üçün Canlı Fəaliyyətlər və Ana Ekran vidceti təqdim edəcək.

Apple Xidmətlər üzrə baş vitse-prezidenti Eddi Kyu mətbuat şərhində deyib: "Formula 1 ilə əlaqələrimizi genişləndirməkdən və ABŞ-dakı Apple TV abunəçilərinə planetin ən həyəcanlı və sürətlə böyüyən idman növlərindən birinə "ön cəbhə" çıxışı təklif etməkdən çox məmnunuq." O əlavə edib: "2026-cı il F1 üçün yeni komandalardan yeni qaydalara və dünyanın ən yaxşı sürücülərinin idarə etdiyi avtomobillərə qədər dəyişikliklərlə dolu yeni bir dövr başlayır. Biz müştərilərimizə yalnız Apple-ın edə biləcəyi şəkildə keyfiyyətli və azarkeş yönümlü yayımlar təqdim etməyi səbirsizliklə gözləyirik."

Formula 1, Apple TV-nin yayım siyahısına daxil olan ən yeni idman növüdür və beləliklə, Major League Soccer (MLS) və Major League Baseball (MLB) yarışlarına qoşulur. Apple qeyd edir ki, F1 dünyanın ən sürətlə böyüyən liqalarından biridir; 2024-cü ildə ABŞ-dakı azarkeş kütləsi 52 milyona çatıb.