ABŞ-ın süni intellektli hava hücumundan müdafiə kameraları Vaşinqtonu qoruyacaq

ABŞ Müdafiə Nazirliyi Vaşinqtonun hava məkanının təhlükəsizliyini təmin etmək üçün yeni, süni intellekt (Sİ) əsaslı görüntü tanıma sistemi – “Genişlənmiş Regional Vəziyyətə Baxış” (ERSA) sistemini yerləşdirib. 2001-ci il sentyabrın 11-dən sonra quraşdırılan və illərlə yenilənməyən köhnə kameraların yerini alan bu sistem, ölkənin hava məkanının mühafizəsində yeni bir səhifə açır.

Nyu-York ştatındakı Şərq Hava Müdafiə Diviziyası (EADS) tərəfindən idarə olunan ERSA sistemi, Vaşinqtona təxminən 300 mil məsafədən fəaliyyət göstərir. Birgə Hava Müdafiə Əməliyyatları Mərkəzi (JADOC) radar siqnalları ilə aşkarlanan obyekti təyin edə bilmədikdə, ERSA-nın Sİ-əsaslı kameraları işə düşür. Sistem təhlükəli uçan obyektləri vizual olaraq yoxlayır və təhlükə olduqda, uçuş qaydalarını pozan obyektlərə Vaşinqtonun xüsusi uçuş zonasından uzaqlaşmaları barədə xəbərdarlıq edilir.

Qeyd edək ki, ERSA sistemi həm gündüz, həm də az görünürlük şəraitində işləyən optik və infraqırmızı kameralarla təchiz olunub. Sistem hətta quşlar kimi kiçik ölçülü obyektləri və hədəfləri müxtəlif uçuş rejimlərində izləyə bilir. Beləliklə, bu Sİ kameraları göydə nə uçduğunu bilir. Əslində, 2001-ci ildən Vaşinqtonun hava məkanında istifadə olunan köhnə kamera sistemləri 11 sentyabr hadisələrindən sonra quraşdırılmışdı və 22 ildən sonra ilk dəfə olaraq yenilənir.