24 karat qızıl örtüklü RTX 5090 artıq satışdadır! Qiyməti sizi heyrətləndirəcək

ASUS şirkəti Yaxın Şərq və Şimali Afrika bazarı üçün xüsusi olaraq hazırlanmış məhdud buraxılışlı ROG Astral GeForce RTX 5090 Dhahab Edition qrafik kartını təqdim edib. 24 karat qızıl örtüklü dizaynı, ərəb xətti və regional motivləri ilə diqqət çəkən kartın başlanğıc qiyməti 6700 dollardır.

5 fevral 2025-ci il tarixində Səudiyyə Ərəbistanının paytaxtı Riyad şəhərində keçirilən xüsusi tədbirdə təqdim olunan ROG Astral RTX 5090 Dhahab Edition, məhdud sayda satışa çıxarılıb. "Dhahab" sözü ərəb dilində "qızıl" mənasını verən kartın dizaynı da öz adını doğruldur. 6,5 qram saf 999 əyar (24 karat) qızıldan ibarət olan məhsul regional mədəniyyəti və müasir texnologiyanı bir araya gətirir. Kartın üst örtüyü ərəb xəttatlığından ilhamlanmış naxışlar və simvollardan ibarətdir.

Qızılı rəngli örtük sadəcə estetik element deyil, həm də soyutma sisteminin bir hissəsi olaraq istilik qəbuledicisi və arxa paneldə istifadə olunur. Bundan əlavə, kart ön tərəfdə üç, arxa tərəfdə isə bir olmaqla dörd pərvanəli xüsusi soyutma sisteminə malikdir. Soyutma sistemi genişlənmiş səth sahəsinə malik MaxContact istilik yayıcısı, faz dəyişən termal yastıqlar və optimallaşdırılmış hava axını kimi komponentlərlə dəstəklənir.

ROG Astral RTX 5090 Dhahab Edition yalnız performansa yönəlmiş istifadəçilərə deyil, həmçinin kolleksiyaçılara və nüfuzlu məhsullarla maraqlananlara da yönəlib. Bu məhsul haqqında nə düşünürsünüz?