Zelenski: Şərəfli Sülh Yalnız Ukraynanın Maraqları Qorunduğu Təqdirdə Əldə Olunacaq

Ukrayna Prezidenti Volodimir Zelenski bildirib ki, Rusiya ilə müharibənin başa çatması və ləyaqətli sülhün əldə olunması yalnız Ukraynanın milli maraqları tamamilə təmin edildiyi halda reallaşa bilər. Prezident Rusiya-Ukrayna müharibəsi ilə bağlı son vəziyyəti sosial media hesabında qiymətləndirib. Zelenski yeni danışıqlar prosesinə ciddi hazırlaşdıqlarını vurğulayaraq, Ukrayna nümayəndə heyətinin yenidən ABŞ-a səfər edəcəyini diqqətə çatdırıb.

Prezident qeyd edib ki, sülh planı üzərində əhəmiyyətli işlər əvvəlcə İsveçrənin Cenevrə şəhərində, daha sonra isə ABŞ-da davam etdirilib. O, Cenevrə və Floridadakı görüşlərin çox effektiv keçdiyini dilə gətirib. Zelenski vurğulayıb ki, görüşlər zamanı Ukraynanı diqqətlə dinlədilər və ölkənin mövqeyi beynəlxalq səviyyədə eşidildi. "Bu, çox vacibdir və biz bu prosesin eyni şəkildə davam etməsini gözləyirik. Şərəfli sülhə nail olmaq üçün əsas şərt Ukraynanın maraqlarının nəzərə alınmasıdır," - deyə o bildirib.

Zelenskinin sözlərinə görə, dünya artıq müharibənin sona çatması ehtimalının yaxınlaşdığının fərqindədir. Prezident hesab edir ki, danışıqlar masasındakı mövcud fəallıq və dinamika Rusiyaya beynəlxalq səviyyədə artan təzyiqlər göstərilməsi yolu ilə daha da gücləndirilməlidir. Bu təzyiq olmadan, prosesin istənilən nəticəni verməsi mümkün olmayacaq.