Üsyankarlar Həməni ələ keçirdi, Şama doğru irəliləyir

Suriyada 27 noyabrda başlayan və Əsəd rejiminə qarşı yönələn hərbi əməliyyatlar sürətlə davam edir. Haləb, İdlib və Təl Rifatdan sonra üsyankarlar Həmə şəhərinin də nəzarətini ələ keçiriblər.

Son məlumatlara görə, üsyankarlar Həməni tamamilə ələ keçirərək, Şama gedən yolda son maneə olan Hums şəhərinə doğru irəliləyirlər. Bu, Suriyanın taleyini müəyyən edə biləcək son dərəcə əhəmiyyətli bir hadisədir.

Suriya ordusu Həmənin itirilməsini təsdiqləyib. Həmə şəhəri 2011-ci ildən bəri rejimin nəzarətində idi. Xüsusilə Həmə mərkəzi həbsxanasının üsyankarlar tərəfindən ələ keçirilməsi xəbəri ciddi narahatlıq yaradır.

Üsyankar qrupların rəhbəri olan Heyət Tahrir əş-Şam (HTŞ) Həmənin bir sıra əsas rayonlarını - Məzarib, Sənaye və Ərbeyn məhəllələrini – ələ keçirərək şəhər mərkəzinə nüfuz ediblər. HTŞ komandanı sosial mediada verdiyi açıqlamada, "Əsədin tankları ilə girib qarət etdiyi və qırğın törətdiyi Həməyə, bu gün biz tanklarla girib xalqımıza azadlığı gətirdik" deyə bildirib.

27 noyabrda Haləbin qərb kənarında başlayan və sürətlə inkişaf edən bu hadisələr, Suriyanın taleyini yenidən müzakirəyə açır. İdlibdəki tam nəzarət və Təl Rifatın azad edilməsindən sonra üsyankarların Həməni ələ keçirməsi, Şama doğru hərəkətlərini sürətləndirmişdir.