Tramp və Makron arasında 30 saniyəlik “Bilək Güləşi”

Qəzzanın gələcəyini müzakirə etmək məqsədilə Misirdə keçirilən beynəlxalq sammitdə ABŞ prezidenti Donald Tramp və Fransa prezidenti Emmanuel Makron arasında baş verən 30 saniyəlik əl sıxma hərəkəti sanki bir bilək güləşinə çevrildi. Makronun Trampın tutuşundan qurtulmağa çalışdığı məqamlar kameralara əks olundu.

"HƏQİQƏTƏN SƏMİMİSƏN?"

Daily Mail-ə danışan dodaq oxuma üzrə mütəxəssis Nikola Hiklinq iki liderin səhnədə qısa, lakin gərgin bir dialoq qurduğunu bildirdi. Hiklinqin sözlərinə görə, Tramp Makrona "Səni görmək xoşdur, elə deyilmi?" deyərkən, Fransa lideri səsi eşidilməyən bir cavabla qarşılıq verib. Daha sonra Trampın "Həqiqətən səmimisən?" sualına Makronun "Əlbəttə" cavabını verdiyi qeyd olunub.

"MƏNİ İNCİTDİN"

ABŞ prezidenti daha sonra Makronun ovucunu daha bərk sıxır və "Yaxşı, indi mənə niyə zərər verdiyini bilmək istəyirəm. Məni incitdin. Bunu bilirəm..." deyir. Dərhal sonra Tramp bir daha Makronun əlini sıxır; Fransa prezidenti isə kameraların önündə başını aşağı salıb uzağa baxır.

Tramp asta və aydın danışaraq, "Mən sülh yaradıram," deyir. Makron isə "Ciddi olma," deyərək Trampla məzələnir.

"NƏ EDƏCƏYİNİ GÖRMƏK İSTƏRƏM"

Lakin Tramp Makronu hədələyərək, "Mən yalnız mənə zərər verənləri incidərəm," deyir. Sonda Makron "Buna baxarıq," deyincə Tramp da "Nə edəcəyini görmək istəyirəm, et. Bir azdan görüşərik," cavabını verir.

İki liderin bu söhbətləri hansı mövzu üzərində apardıqları isə məlum deyil.

BU BİRİNCİ HAL DEYİL

Tramp və Makronun ictimaiyyət qarşısındakı münasibətləri illərdir diqqət çəkir. Onların 2017-ci ildəki görüşlərindəki tam 29 saniyəlik əl sıxması uzun müddət müzakirə edilmişdi. 2018-ci il G7 Sammitində isə 26 saniyəlik əl sıxma zamanı Makronun baş barmağının izinə Trampın əlində rast gəlinmiş, bu hadisə "ən uzun diplomatik əl sıxma" kimi anılmışdı.