Tramp Sərt Xəbərdarlıq Etdi: Narkotiklə Mübarizə Üçün Venesuela Ərazisinə Hərbi Zərbə Endirə Bilərik

ABŞ Prezidenti Donald Tramp Venesuela ərazisindən Amerika Birləşmiş Ştatlarına daxil olduğunu iddia etdiyi narkotik maddələr ticarətinə qarşı dənizdəki əməliyyatlarla yanaşı, lazım gələrsə Venesuelanın torpaqlarına da hərbi zərbələr endirəcəyi barədə sərt xəbərdarlıq edib. Ağ Evdə keçirilən və təxminən iki saat çəkən kabinet toplantısından sonra jurnalistlərin suallarını cavablandıran Tramp, Karib hövzəsində ABŞ ordusunun Venesuela üzərində artırdığı təzyiqi və "narkotik daşıdığı iddia edilən" qayıqlara qarşı hücumları qiymətləndirdi. O, Kolumbiya və Venesuela kimi ölkələrdən gələn qeyri-qanuni maddələrlə hər vəchlə mübarizə aparmaq əzmində olduğunu bildirdi. Prezident qeyd etdi ki, Pentaqona bu işdə tam səlahiyyət verib və mübarizə üçün lazım olan hər şeyi edəcək. O, iddia edir ki, bu ölkələr ABŞ-a gələn narkotiklərin əksəriyyətindən məsuliyyət daşıyırlar.

Tramp, dənizdəki uğurlu əməliyyatlardan danışarkən, Venesuela sahillərindəki gəmilərin məhv edilməsini istədiyini və bu işdə 90%-dən çox irəliləyiş əldə edildiyini vurğuladı. O, dənizdəki mübarizənin tezliklə quruda da davam etdiriləcəyini açıqladı: "Mən o gəmilərin aradan qaldırılmasını istəyirəm və lazım gələrsə dənizdə olduğu kimi, Venesuela torpaqlarına da hücum edəcəyik." Tramp əlavə etdi ki, "Biz bu hücumları qurudan da başlayacağıq. Bilirsiniz ki, quruda hücum etmək daha asandır. Biz onların istifadə etdiyi yolları, onların haqqında hər şeyi, harada yaşadıqlarını bilirik və çox yaxın zamanda buna başlayacağıq. Bu narkotikləri istehsal edən və ölkəmizə satan hər kəs bu hərbi zərbəyə məruz qalacaq."

Digər tərəfdən, Tramp sentyabrın 2-də Venesuela sahillərində "narkotik daşıdığı" iddia edilən bir gəmiyə edilən ikinci hücum əmri ilə bağlı yaranan mübahisəli sualları da cavablandırdı. Amerikanın Washington Post qəzetinin xəbərində, ilk hücumdan yaralı xilas olaraq gəmiyə tutunan iki şəxsin ikinci zərbə nəticəsində öldürüldüyü iddia edilirdi. ABŞ prezidenti narkotiklə mübarizə məsələsində Müdafiə Naziri Pit Heqsethə tam səlahiyyət verdiyini və sözügedən əməliyyatların qanuni əsaslara söykəndiyini müdafiə etdi. Tramp, ikinci hücumda iki yaralının öldürülməsi ilə bağlı ətraflı məlumatının olmadığını bildirsə də, əməliyyatın qanuna uyğun aparıldığını təkid etdi. Nazir Heqseth də açıqlamasında, ikinci hücuma görə vəzifədə olan Admiral Frank Bredlinin tam səlahiyyətli olduğunu və hücum anında yaralıların olması detalını bilmələri üçün heç bir imkan olmadığını iddia etdi.