Şiddətli qış 2024-2025: "La Nina" təsiri ilə Türkiyədə 39 şəhərdə güclü qar gözlənilir

Son illərdə Türkiyənin bir çox bölgəsində qış aylarında gözlənilən bol qar yağışı müşahidə edilməyibsə də, bu il bu tendensiya köklü şəkildə dəyişir. Meteorologiya mütəxəssisləri bildirirlər ki, 2024-2025-ci il qış mövsümü son illərin ən sərt və ən güclü yağıntıları ilə yadda qalacaq. Mütəxəssis rəylərinə görə, Türkiyənin də daxil olduğu Şərqi Aralıq Dənizi Hövzəsində "zəif La Nina" effektinin təsir göstərməsi gözlənilir. Bu hava şəraiti dekabrın 20-dən yanvarın 20-dək ölkə miqyasında çox güclü qar yağışlarının yaşanmasına səbəb ola bilər.

İqlimşünas Dr. Okan Bozyurt qeyd edib ki, bu il yağıntı səviyyəsi mövsüm normalarından xeyli yüksək olacaq. O, qar yağışlarının şiddətli olacağı üç əsas bölgəyə diqqət yetirilməsini xüsusi vurğulayıb. Bu bölgələr Mərmərə, Qara Dəniz, həmçinin İç Anadolunun şimal hissələri və Egeyin daxili əraziləridir. Bozyurt bu bölgələrdə ciddi qar fırtınalarının gözlənildiyini ifadə edib. Əlavə olaraq, yeni ilin ilk günlərində (yanvarın əvvəllərində) ağ örtüklə tamamilə örtülməsi gözlənilən 39 şəhərin siyahısı da açıqlanıb.

Qar yağışı altında qalacağı proqnozlaşdırılan şəhərlərin siyahısı geniş coğrafi ərazini əhatə edir. Siyahıya İstanbul, Təkirdağ, Ədirnə, Kırklareli, Balıkesir, Çanaqqala, Bursa, Biləcik, Sakarya, Kocaeli, Yalova, Artvin, Rizə, Bayburt, Trabzon, Gümüşxanə, Giresun, Ordu, Tokat, Amasya, Samsun, Sinop, Çorum, Kastamonu, Bartın, Karabük, Zonguldak, Düzcə, Bolu, Çankırı, Ankara, Əskişəhər, Yozqat, Sivas, Kırıkkale, İzmir, Aydın, Muğla və Manisa daxildir. Bu proqnozlar yaxınlaşan qış mövsümündə Türkiyədə ciddi hava dəyişikliklərinin olacağını və yerli qurumların hazırlıq görməli olduğunu göstərir.