Roma Papası XIV Leonun İzniki ziyarəti MHP-nin hiddətinə səbəb oldu: Sərt siyasi bəyanat

Katolik dünyasının ruhani başçısı Roma Papası XIV Leon, Birinci İznik Kilsə Məclisinin 1700-cü ildönümü ilə əlaqədar Türkiyənin İznik şəhərində keçirilən ayinə qatıldıqdan sonra İstanbula yola düşüb. Romanın başçısının şənbə səhəri ilk dayanacağı Sultanəhməd Məscidi olub. Daha sonra o, Yeşilköydə yerləşən Mor Efrem Süryani Qədim Ortodoks Kilsəsini ziyarət edərək xristian icmalarının nümayəndələri ilə görüşüb. Papanın 27 noyabr-2 dekabr tarixlərini əhatə edən bu səfəri, təkcə dini yox, həm də ölkənin siyasi gündəmində geniş müzakirələrə səbəb olub.

Papanın Türkiyəyə gəlişi, xüsusən də İznikdəki ayinə qatılması, Milliyyətçi Hərəkat Partiyasının (MHP) sərt reaksiyasına yol açıb. MHP Başqan müavini və İstanbul millət vəkili Semih Yalçın sosial media hesabından etdiyi açıqlamada səfəri kəskin tənqid edib. Yalçın qeyd edib ki, xristian dünyasına ünvanlanmış planlı mesajlar daşıyan və həm tarixi, həm də dini ayrı-seçkiliyi qızışdırmağı hədəfləyən bu səfər bir növ şouya çevrilib. O vurğulayıb ki, səfərin İznik mərhələsində 325-ci ildə baş tutmuş 1700 illik Kilsə Məclisi Toplantısı yenidən canlandırılıb və təmtəraqlı bir ayin keçirilib. Partiya rəsmisi bu məqsədli ayinin Səlcuqlu və Osmanlı irsi olan Türk torpaqlarında xristian aləminin birləşməsini hədəflədiyini bildirərək, bunun ictimaiyyətdə böyük narahatlıq yaratdığını deyib.

Bu siyasi gərginlik fonunda, Semih Yalçın MHP sədri Dövlət Baxçalının başqa bir addımını da açıqlayıb. Yalçın bildirib ki, Lider Baxçalı ATV kanalında yayımlanan “Quruluş Orxan” serialının ssenarist və prodüseri Mehmet Bozdağa zəng edib. MHP sədri həmin zəngdə serialın Türk tarixi və Anadolu coğrafiyası baxımından çox əhəmiyyətli, öyrədici və xəbərdaredici bir iş olduğunun altından xətt çəkib. Dövlət Baxçalı, yaxından izlədiyi bu uğurlu ekran işinin millət tərəfindən həssaslıqla və maraqla seyr edilməsini tövsiyə edib.