Qəzza: İsrailin Xan Yunusa zərbəsi nəticəsində 2-si uşaq olmaqla 5 nəfər həlak oldu

Küveyt Səhra Xəstəxanasının tibbi heyəti bildirib ki, İsrail təyyarələrinin Qəzzanın sahil bölgəsi, əl-Mavasi ərazisindəki Xan Yunusun qərbində yerindən-yurdun köçmüş insanların çadırlarına endirdiyi zərbə nəticəsində iki uşaq və iki qadın da daxil olmaqla, beş fələstinli həyatını itirib. Bu amansız hücumda ən azı 32 yaralı xəstəxanada müalicə altına alınıb. Tibb işçiləri ölənlərin 46 və 30 yaşlı iki qadın, 36 yaşlı bir kişi, habelə 8 və 10 yaşlarında iki oğlan uşağı olduğunu təsdiqləyiblər.

Təcili yardım və xilasetmə işçiləri BBC-yə açıqlamasında, cəsədlərin son aylarda yüzlərlə məcburi köçkünün yaşadığı Əl-Nəcat düşərgəsindəki çadırlardan çıxarıldığını bildiriblər. Görgü şahidlərinin sözlərinə görə, ilk hücum əl-Mavasidə köçkünlərin məskunlaşdığı ərazidəki bir çadırı hədəf alıb. Ardınca Küveyt xəstəxanası yaxınlığında baş verən partlayışlar orada qalan ailələr arasında böyük çaxnaşmaya səbəb olub.

İsrail ordusu hadisəni dekabrın 3-ü səhər saatlarında beş əsgərinin yaralanmasından sonra bir "HƏMAS terrorçusuna" zərbə endirməsi kimi əsaslandırıb. Ordunun yaydığı bəyanatda iddia edilir ki, "HƏMAS terror təşkilatı Rəfah bölgəsində yerləşdirilmiş İsrail qoşunlarına hücum etməklə atəşkəs razılaşmasını açıq şəkildə pozub". İsrailin Baş naziri Benyamin Netanyahu gün ərzində verdiyi açıqlamada bu hadisəyə lazımi şəkildə cavab veriləcəyinə söz vermişdi.

HƏMAS İsrailin bu hərəkətini qəddar, ayrı-seçkilik qoymayan və oktyabrın 10-da başlayan atəşkəsi pozan bir əməl kimi qiymətləndirib. Xatırladaq ki, İsrail ordusu Qəzzaya hücumları HƏMAS-ın 7 oktyabr 2023-cü ildə İsrailin cənubuna etdiyi və təxminən 1200 nəfərin öldüyü, 251 nəfərin isə girov götürüldüyü hücuma cavab olaraq başlamışdı. Regionda HƏMAS tərəfindən idarə olunan Səhiyyə Nazirliyinin məlumatına görə, İsrailin davam edən hücumları nəticəsində indiyə qədər 70 mindən çox Fələstinli həyatını itirib.