Ölkədən qaçan Ünsal Ban barədə həbs qərarı! Qırmızı bülleten tələbi

Türk Hava Qurumu (THQ) Universitetinin sabiq rektoru Ünsal Ban, bəzi şirkətlərin kapitalının artırılması ilə bağlı rüşvət iddiaları ilə gündəmə gəlmiş və haqqında açılmış dörd işin üçündə ölkədən çıxış qadağası olmasına baxmayaraq, xaricə qaçıb.

DAŞINMAZ ƏMLAKLA YUNANISTANDAN YAŞAYIŞ İZNİ VƏ PASPORT ALIB

T24-ün məlumatına əsasən, Ban daşınmaz əmlak almaq yolu ilə Yunanıstandan “Qızıl Viza” (Golden Visa) proqramı çərçivəsində yaşayış icazəsi alıb və Yunanıstan pasportu çıxarıb. Banın bu pasportu 2022-ci ildə aldığı görünür. Əvvəlcə daşınmaz əmlak alaraq Yunanıstanda yaşayış icazəsi verən “Qızıl Viza” kartını alan Banın bu kartla pasport ala bilmədiyi iddia edildiyindən, bu sənədinin həqiqiliyi hələ məlum deyil. Banın pasport almaq hüququ qazanması üçün Yunanıstan vətəndaşı olması tələb olunur.

BAŞ PROKURORLUQDAN HƏBS QƏRARI

NOW Haber-dən Alican Uludağ bildirir ki, İstanbul Cümhuriyyət Baş Prokurorluğu Ban barəsində tutulma qərarı (yakalama kararı) çıxarıb. Baş Prokurorluğun həmçinin beynəlxalq axtarış üçün Qırmızı bülleten işlərinə başladığı da öyrənilib.

ÜNSAL BAN KİMDİR?

Ünsal Ban 29 avqust 2022-ci ildə "şəxsi məlumatları mütəşəkkil cinayətkar qruplaşma lideri ilə bölüşmə", "hədə-qorxu gəlmə" və "şantaj" ittihamları ilə nəzarətə alınmış və həbs edilmişdi. (Qeyd edək ki, 30 aprel 2025-ci ildə isə Borsa İstanbulda manipulyasiya hərəkətləri etdiyi iddia edilən 15 nəfər barədə də həbs qərarı verilmişdi). Ban 2 sentyabr 2022-ci ildə "yaşayış yerini tərk etməmək" şərti ilə azadlığa buraxılsa da, Ankara Cümhuriyyət Baş Prokurorluğunun qərara etiraz etməsindən sonra yenidən nəzarətə alınmış və 3 sentyabr 2022-ci ildə təkrar həbs olunaraq cəza evinə göndərilmişdi.

Ban tutulduğu bu işdən azad edildikdən bir gün sonra "cinayətdən əldə edilən əmlak dəyərlərini leqallaşdırma" (çirkli pul yuyulması) istintaqı ilə əlaqədar olaraq keçmiş həyat yoldaşı Gülcan Bal, oğlu Emre Buğra Ban, qardaşı Ünal Ban və sürücüsü Əhməd Qarataşın da daxil olduğu 9 nəfərlə birlikdə nəzarətə alınmışdı. 14 fevral 2023-cü ildə Ünsal Ban, Ünal Ban, Gülcan Ban, Emre Buğra Ban və Əhməd Qarataş sözügedən cinayətə görə Sülh Cəza Məhkəməsi tərəfindən həbs edilmiş, digər şübhəlilər isə məhkəmə nəzarəti şərti ilə sərbəst buraxılmışdı. Ban 13 ay sonra "çirkli pulların yuyulması" ittihamı ilə mühakimə olunduğu iş üzrə azadlığa buraxılmışdı.