Nyu Cersi ştatında (Paterson) İMMİQRASİYA ƏMƏLİYYATLARI: ABŞ-dakı Türk İcması Dərin Həyəcan İçində

ABŞ-ın Nyu Cersi ştatındakı Paterson şəhərində son günlər ardıcıl keçirilən immiqrasiya əməliyyatları yerli əhali arasında böyük narahatlığa səbəb olub. Ölkədə türk əhalisinin ən sıx yaşadığı məkan kimi tanınan Patersonda, ICE (İmmiqrasiya və Gömrük İcrası) qruplarının küçələrdə şəxsiyyət yoxlamaları aparması və çox sayda evə, eləcə də iş yerinə basqınlar təşkil etməsi bölgədəki türk icması arasında ciddi gərginlik yaratmışdır. Görgü şahidlərinin dediyinə görə, ICE əməkdaşları yoldan keçən şəxsləri saxlayıb sorğu-sual edir, bəzi iş yerlərinə və yaşayış yerlərinə yoxlama üçün daxil olur və çoxlu insanı nəzarətə götürürlər. Bu əməliyyatlar zamanı saxlanılanlar arasında türk vətəndaşlarının da olduğu iddia edilir.

Əldə edilən məlumatlara görə, nəzarətə alınan türk vətəndaşlarının sayının 8 ilə 10 nəfər arasında olduğu irəli sürülür. Əməliyyatlar baş verəndən sonra Main Street ətrafında sıx şəkildə yerləşən türk bizneslərində vəziyyət pisləşib. Ərazidəki sahibkarlar küçələrin boş qaldığını və müştəri sayının kəskin azaldığını bildirirlər. Satıcılar "Müştəri gəlmir, hamı çölə çıxmaqdan çəkinir" deyirlər. Hətta bəzi yerli sakinlər insanların sanki evlərinə qapandığını, çölə addım atmaq istəmədiyini bildirir. Bu vəziyyət miqrantların sıx yaşadığı məhəllədə dərin bir narahatlıq və sarsıntı yaradıb.

Paterson şəhəri ABŞ-da ən böyük türk diasporuna ev sahibliyi etdiyi üçün əməliyyatların miqyası və icra üsulu yerli türklər arasında sual doğurub. İnsanlar "Biz hədəf alınırmıyıq?" deyə soruşurlar. Türk icması həm tutulma iddiaları, həm də şəxsiyyət yoxlamalarının sərt üsulla həyata keçirilməsi səbəbindən daimi qorxu hissi yaşayır – onlar "Qapımız hər an döyülə bilər" narahatlığı ilə yaşayırlar. Şəhərdə yaşayan bir çox türk ailəsi əməliyyatların davam etməsindən və bunun uşaqlarının gündəlik həyatına mənfi təsir göstərməsindən ciddi şəkildə narahatdırlar.

Cəmiyyət nümayəndələri yaranmış vəziyyətlə bağlı aydın bir açıqlama verilməsini tələb edirlər. Onlar həmçinin, bölgədə yaşayan miqrantların hüquqi haqları barədə lazımi məlumatlarla təmin olunmasını istəyirlər. Türk icmasının nümayəndələri əhalinin hüquqlarının qorunması və yaranmış vəziyyətin tez bir zamanda aydınlaşdırılması üçün səlahiyyətli orqanlara müraciət ediblər.