Norveçin Sabiq Baş Naziri Torbjørn Jagland Jeffrey Epstein Əlaqələrinə Görə Ağır Korrupsiyada Şübhəli Bilinir

ABŞ Ədliyyə Nazirliyinin ictimaiyyətə açdığı son Jeffrey Epstein sənədləri Norveçin siyasi elitasında böyük qalmaqala səbəb oldu. Norveç polisi ölkənin sabiq Baş naziri Torbjørn Jagland barədə cinayət işi başladıb. 75 yaşlı Jagland seks cinayətkarı Jeffrey Epstein ilə əlaqələrinə görə "ağır korrupsiya" şübhəsi ilə istintaq edilir. Yanvarın 30-da yayımlanan milyonlarla səhifəlik sənədi araşdırmaq məqsədilə Norveç polisi xüsusi bir işçi qrupu yaradıb. Bu şəxs 1996-1997-ci illərdə Baş nazir vəzifəsini tutub, həmçinin uzun müddət yüksək səviyyəli diplomat, Norveç Nobel Komitəsinin sədri və 2009-2019-cu illərdə Avropa Şurasının Baş katibi kimi mühüm vəzifələrdə çalışıb. Bu istintaq Norveçin ən nüfuzlu siyasi xadimlərindən birinin karyerasını təhlükə altına atır.

İstintaqı aparan qurum İqtisadi Cinayətlər İdarəsidir (Okokrim). Okokrim rəhbəri Pal K. Lonseth bildirdi ki, Epstein sənədlərinin məhz Jaglandın vəzifədə olduğu dövrü əhatə etməsi səbəbi ilə "sorğuşturma üçün ağlabatan əsaslar olduğuna inanırıq". Polis artıq Xarici İşlər Nazirliyinə müraciət edərək, Jaglanda əvvəlki diplomatik funksiyaları səbəbindən verilmiş diplomatik toxunulmazlığın qaldırılmasını tələb edib. Norveçin Xarici İşlər Naziri Espen Barth Eide bu işin bütün tərəflərinin işıq üzü görməsinin vacibliyini vurğuladı və Avropa Şurasından da Jaglandın toxunulmazlığını ləğv etmələrini xahiş edəcəklərini bildirdi. Okokrim istintaq zamanı Torbjørn Jaglandın vəzifədə olduğu müddətdə hansı hədiyyələr, səyahətlər və ya kreditlər alıb-almadığını yoxlayacaq. Jaglandın vəkili Anders Brosveet isə istintaqla tam əməkdaşlıq edəcəklərini və nəticənin müsbət olacağına əmin olduqlarını söyləyib.

Lakin ifşa olunan sənədlər yalnız sabiq Baş nazirə aid deyil. Onlar Norveç Kral Ailəsinin də adını hallandırıb. Epstein işi ilə bağlı yayımlanan sənədlərdə Norveç Vəliəhd Şahzadəsi Mette-Maritin 2011-2014-cü illər arasında Epsteinlə yazışmaları aşkarlandı. Şahzadə Mette-Marit seks cinayətkarı ilə əlaqə qurmağın "pis qərar" olduğunu etiraf edərək, bu ünsiyyətin "utandırıcı" olduğunu dedi. O, Epstein tərəfindən istismara məruz qalan qurbanlarla həmrəylik ifadə etdi. Sənədlər Mette-Maritin Epsteinin Floridadakı evində, o, orada olmadığı zaman dörd gün qaldığını da göstərir. Ən çox müzakirə edilən yazışmalardan birində Şahzadənin Epsteinə 15 yaşlı oğluna serf taxtası daşıyan iki çılpaq qadının təsvir olunduğu divar kağızını göstərməyin uyğun olub-olmadığını soruşması qeyd olunur.

Bu məlumatların yayılması ölkədə ciddi siyasi və ictimai rezonans doğurdu. Norveç Baş naziri Jonas Gahr Støre Mette-Maritin bu əlaqəni "pis qərar" hesab etməsi fikri ilə razılaşdığını söylədi. Baş nazirin kral ailəsinə qarşı bu cür üstüörtülü tənqid bildirməsi Norveç üçün nadir hallardan biridir. Hazırda ictimaiyyət Vəliəhd Şahzadənin bu ünsiyyətin zəhərli tərəfini niyə qavramadığını və daha da əhəmiyyətlisi, bu yazışmalarda rəsmi kral e-poçt adresini istifadə etməsini müzakirə edir. Həm sabiq Baş nazirin, həm də Vəliəhd Şahzadənin adının Epstein işində hallanması, Norveçin yüksək dairələrində ciddi etimad böhranına səbəb olur.