MİT rəhbəri İbrahim Kalın İstanbulda HƏMAS nümayəndə heyəti ilə Qəzza atəşkəsini müzakirə etdi

Türkiyə Milli Kəşfiyyat Təşkilatının (MİT) sədri İbrahim Kalın İstanbulda HƏMAS Siyasi Bürosu Danışıqlar Heyətinin rəhbəri Xəlil Həyyə və onu müşayiət edən nümayəndə heyəti ilə görüşüb. Bu görüşdə əsas diqqət Qəzzada əldə edilmiş atəşkəs razılaşmasının durumu, davamlılığın təmin edilməsi yolları və humanitar vəziyyətin yaxşılaşdırılması məsələlərinə yönəlib.

Görüşdən sonra yayılan rəsmi açıqlamada HƏMAS heyətinin atəşkəsin təmin edilməsi və prosesin izlənməsində vasitəçi və zəmanətçi olan Türkiyənin roluna və cəhdlərinə, xüsusilə də Prezident Rəcəb Tayyib Ərdoğana təşəkkürlərini çatdırdığı bildirilib. HƏMAS nümayəndələri həmçinin, İsrail tərəfinin atəşkəs dövründə törətdiyi pozuntulara baxmayaraq, atəşkəs razılaşmasına sadiqliyini bir daha təsdiqləyiblər. İki heyət atəşkəs prosesinin sağlam şəkildə davam etməsi üçün atılacaq zəruri addımları və mövcud problemlərin necə aradan qaldırılacağını danışıblar. Eyni zamanda, atəşkəs planının sonrakı mərhələlərinin həyata keçirilməsi üçün izləniləcək yollar üzrə məsləhətləşmələr aparılıb.

Danışıqlar zamanı Türkiyənin Qəzzaya göndərdiyi humanitar yardımlar və bəşəri dramın sona çatdırılması istiqamətindəki fəaliyyətləri barədə məlumat verilib. Qəzzaya daha çox yardımın daxil olması üçün beynəlxalq təşkilatlarla birgə aparılan işlər müzakirə mövzusu olub. İsrail ilə HƏMAS arasında əldə edilən atəşkəs və əsir mübadiləsi sazişi oktyabrın 10-da qüvvəyə minmişdi. Sazişdə qeyd olunduğu kimi İsrail ordusunun "Sarı Xətt"dən geri çəkilməsindən sonra Qəzza zolağında atəşkəsin həmin gün saat 12:00-dan etibarən qüvvəyə mindiyi açıqlansa da, İsrail ordusu müxtəlif bəhanələrlə fələstinlilərə qarşı hücumlarını bəzən davam etdirmişdi.

Görüşdə həmçinin əsir və cəsəd mübadiləsi prosesindəki çətinliklərə toxunulub. Qəzzada 28 İsrail əsirinin cəsədinin qaldığı məlumat verilib. HƏMAS əvvəllər 17 cəsədi İsrailə təhvil vermişdi. Qəzzadakı Fələstin Səhiyyə Nazirliyinin məlumatına görə, İsrail Qırmızı Xaç vasitəsilə 195 fələstinlinin cəsədini şəxsiyyət məlumatlarını vermədən Qəzzadakı səlahiyyətlilərə təhvil verib, lakin bunlardan yalnız 72-sinin kimliyi müəyyən edilə bilib. Qəzza hökumətinin Media Ofisinin rəhbəri İsmayıl əs-Səvabitə bildirib ki, İsrailin geri verdiyi cəsədlər üzərində işgəncə və yaxın məsafədən atəş açılma izlərinə rast gəlinib. Bu cür tapıntılar İsrailin fələstinli əsirlərə qarşı "yerindəcə edamlar" tətbiq etdiyinə dair dəlil hesab edilir. Zəmanətçi ölkələr BMT-nin məlumatına görə iki illik hücumlar nəticəsində Qəzzada yaranan 55 milyon ton dağıntı fonunda, bütün ölü İsrail əsirlərinin cəsədlərinin tapılmasının çətin olduğunu qəbul ediblər. Sərt İsrail embarqosu və ağır tikinti texnikasının çatışmazlığı təxminən 10 min fələstinlinin nəşinə və İsrail əsirlərinin cəsədlərinə çatmağı çətinləşdirir.