Luvr Muzeyində Gündüz Soyğunu: 8 Əvəzsiz Kral Zərgərlik Əşyası Necə Oğurlandı?

Parisdə yerləşən dünyanın ən məşhur muzeylərindən biri olan Luvrda gündüz saatlarında cəsarətli bir soyğun baş verib. Dörd nəfərdən ibarət cinayətkar dəstə səkkiz çox qiymətli zərgərlik əşyası oğurlayaraq qaça bilib. Hadisə bazar günü səhər, muzey qapılarını ziyarətçilərin üzünə açdıqdan cəmi dəqiqələr sonra – yerli vaxtla 09:30-dan 09:40-a qədərki qısa müddətdə reallaşıb. Quldurlar qeyri-standart bir metoddan istifadə ediblər. Onlar avtomobilə bərkidilmiş mexaniki lift vasitəsilə Sena çayının yaxınlığındakı balkona qalxıblar. Daha sonra, kral zərgərlik kolleksiyasının saxlandığı Apollon Qalereyasına daxil olublar. Olay yerindən çəkilən fotoşəkillərdə, nəqliyyat vasitəsinə yüklənmiş nərdivanın birinci mərtəbə pəncərəsində göründüyü qeyd olunur.

Hırsızlardan ikisi şüşələri simsiz kəsici alətlə kəsərək muzeyə soxulub. Onlar içəridəki mühafizəçiləri təhdid edib, uzaqlaşmalarını təmin ediblər. Fransa mediasının məlumatına görə, cinayətkarların girdiyi üç otaqdan birində təhlükəsizlik kamerası işləmirmiş. Fransa Mədəniyyət Nazirliyi oğurlanan zərgərlik əşyalarının mədəni irs dəyəri baxımından “əvəzsiz” olduğunu bildirib. Çalınan səkkiz parçanın əksəriyyəti 19-cu əsrə, xüsusən də Napoleon və III Napoleon dövrünə aid olub. Bu əşyalar minlərlə almaz və qiymətli daşlarla bəzədilib. Qeyd etmək lazımdır ki, qaçarkən hırsızlar üzərində iki min almaz olan bir tacı yerə salıblar. 1789-cu il Fransız İnqilabından sonra kral ailəsinə məxsus qiymətli əşyaların çoxu itirilmişdi; hazırda muzeydə nümayiş olunanlar xilas edilənlər və ya sonradan ölkəyə geri qazandırılanlardır.

Hollandiyalı sənət cinayətləri üzrə müstəntiq Artur Brand bu hadisənin muzey təhlükəsizliyindəki böyük boşluqları üzə çıxardığını deyib. Brand, bu soyğunun "son 10 ilin ən böyük soyğunu" olduğunu vurğulayaraq, Luvr kimi qlobal əhəmiyyətli bir məkanı hədəf alıb, ordan qaçmağın təhlükəsizlikdə ciddi çatışmazlıqların göstəricisi olduğunu bildirir. Brand, bu hırsızların yüksək səviyyəli peşəkarlar olduğuna və əvvəllər də bu cür işlər gördüyünə inanır. O, "Adi bir adam səhər durub, 'Luvrdan başlayaq' deməz" deyə qeyd edir. Tarixi zərgərlik mütəxəssisi Vinsent Meylan isə kataloqa salınmış bu kimi əşyaların indiki formada satılmasının mümkünsüzlüyünə işarə edir. Brand da bu fikri təsdiqləyir və hırsızların başqa yollar tapacağını proqnozlaşdırır.

Mütəxəssislər oğurlanan əşyaların taleyinin necə olacağı ilə bağlı fikirlərini bölüşüblər. Artur Brandın sözlərinə görə, əsərlər birbaşa satılmadığı üçün hırsızlar onları hissələrə ayırmalıdırlar. Bu, qızıl və gümüşün əridilməsi, almazların isə ayrı-ayrı satılması deməkdir. Əgər almazlar tək-tək satılsa, heç kim onların soyğundan gəldiyini bilməyəcək. Brand, bəzi fərziyyələrə baxmayaraq, xüsusi kolleksionerin belə bir oğurluğu sifariş etməsi ehtimalını rədd edir. O, bu cür asanlıqla tanınan əşyalara heç kimin sahib olmaq istəməyəcəyini, çünki onları nə dostlara göstərmək, nə də satmaq mümkün olduğunu bildirir. Luvrın tarixində oxşar hadisələr yaşanıb. Məsələn, 1911-ci ildə bir muzey işçisi "Mona Liza" əsərini oğurlamışdı, lakin rəsm iki il sonra tapılmışdı. 1997-ci ildə Kamil Koro'nun rəsmi isə çalındıqdan sonra heç vaxt tapılmayıb. Son dövrdə Fransa muzeyləri hədəfə çevrilir: keçən ay Limoqesdəki Adrien Dubouche Muzeyindən 11 milyon dollarlıq çini, noyabr 2024-də isə Parisdəki Konyak-Cey Muzeyindən böyük tarixi əhəmiyyətə malik yeddi əsər oğurlanmışdı.