Kennedi Lənəti Yenidən: JFK-nin Nəvəsi Nadir Leykozla Mübarizə Apardığını Açıqladı

1940-cı illərdən bəri ABŞ-ın ən tanınmış ailələrindən olan Kennedilərin üstündə gəzən "lənət" yenidən özünü göstərir. Ölkə başçısı olarkən sui-qəsd nəticəsində həlak olan keçmiş ABŞ Prezidenti Con F. Kennedinin (JFK) nəvəsi, 35 yaşlı Tatiana Şlossberq (Tatiana Schlossberg) xərçənglə mübarizə apardığını bildirib. O, 2024-cü ilin may ayında nadir mutasiyalı kəskin miyeloid leykoz (AML) diaqnozu aldığını və həkimlərin ona təxminən bir illik ömür qaldığını söylədiklərini açıqlayıb. Kennedi ailəsi demək olar ki, bir əsrdir davam edən bu cür fəlakətlərlə yadda qalır.

Con F. Kennedinin qızı Karolin Kennedinin övladı olan Şlossberq, "The New Yorker" jurnalı üçün yazdığı məqalədə bu diaqnozun onun üçün böyük şok olduğunu ifadə edib. O, xüsusilə də uşaqlarının onu xatırlayıb-xatırlamayacağı barədə ciddi narahatlıqlarını dilə gətirib. Gənc qadın xəstəliklə mübarizə dövründə çoxsaylı müalicələr aldığını qeyd edib. Bunların arasında kimyaterapiya, iki dəfə sümük iliyi nəqli və bəzi qan xərçənglərinə qarşı təsirli olduğu bilinən CAR-T hüceyrə terapiyasının klinik sınaqlarında iştirak yer alıb.

Şlossberq, müalicələrin intensivliyinin onun immunitet sistemini kəskin zəiflətdiyini və nəticədə uşaqlıq peyvəndlərini təkrar etməli olduğunu vurğulayıb. Bu ilin əvvəlində leykozun yenidən geri qayıtdığını və həkimlərin bunun mutasiya ilə əlaqəli olduğunu söylədiklərini bildirib. Son klinik sınaqlar zamanı həkimlər yenidən ona təxminən bir illik ömür müddəti biçiblər. O, həmçinin ABŞ Səhiyyə və İnsan Xidmətləri Naziri Robert F. Kennedi Jr.-ın (Robert F. Kennedy JR.) əmisi qızıdır və bu çətin dövrdə səhiyyə sisteminə olan inamının sarsıldığını qeyd edib.

Kennedi ailəsinin faciələrinin xronologiyası 1940-cı illərdən bəri başlayır. Ən unudulmaz hadisə 1963-cü ildə Prezident Con F. Kennedinin sui-qəsd nəticəsində qətlə yetirilməsi olsa da, ailə çoxlu sayda ölüm və bədbəxtliklə qarşılaşıb. Məsələn, 1944-cü ildə JFK-nin qardaşı Cozef P. Kennedi Jr. pilotluğunu etdiyi hərbi təyyarənin İngiltərə üzərində partlaması nəticəsində ölüb. Həmin ilin sentyabrında Ketlin Kennedinin əri, Hartinqton Markizi Vilyam Kavendiş Belçikada bir alman snayperi tərəfindən vurularaq öldürülüb. Ketlin "Kik" Kennedi özü isə dörd il sonra, 1948-ci ildə Fransada təyyarə qəzasında həlak olub.

Faciə silsiləsi sonrakı onilliklərdə davam edib. 1968-ci ildə senator Robert F. Kennedi Los-Ancelesdə güllə yaralarından dünyasını dəyişdi. Robert F. Kennedinin oğlanları David A. Kennedi (1984) narkotik dozası səbəbindən, Maykl LeMoyne Kennedi (1997) isə xizək qəzasında vəfat etdilər. 1999-cu ildə Con F. Kennedi Jr., idarə etdiyi təyyarənin Massaçusets sahillərində qəzaya uğraması nəticəsində həyat yoldaşı və baldızı ilə birlikdə həlak oldu. Ailənin son faciələrinə 2019-cu ildə Robert F. Kennedinin nəvəsi Saoirse Kennedi Hillin təsadüfi dozadan ölümü və 2020-ci ildə Robert F. Kennedinin nəvəsi Meyv Kennedi Mckin və onun səkkiz yaşlı oğlu Gideonun kano gəzintisi zamanı Çesapik körfəzində boğulması daxildir. Tatiana Şlossberqin nadir xərçənglə mübarizəsi göstərir ki, Amerika siyasətinin bu tarixi ailəsini izləyən kədərli hadisələr silsiləsi hələ də başa çatmayıb.