İsrail Livanın 5 şəhərinə hava zərbəsi endirib

İsrail Livanın 5 şəhərinə eyni anda hava zərbələri endirib. İsrail təyyarələri bir çox nöqtəni vurduğu zamanlar kameraya yansıyıb. İSRAİLDƏN LİVANA HAVA ZƏRBƏSİ İsrail ordusu atəşkəsi bir daha pozaraq, Livanın cənub və şərqindəki yaşayış məntəqələrinə 10-dan çox hava hücumu həyata keçirib. Livanın NNA xəbər agentliyinin məlumatına görə, İsrail ordusu Livanın cənubundakı Nəbatiyyə, Sayda, Mərcəyun və Bint Cubeyl, eləcə də şərqdəki Bəqa bölgəsinə aid Baalbek şəhərlərini hədəfə alıb.

Bildirilir ki, İsrail döyüş təyyarələrinin həyata keçirdiyi güclü hücumların bəziləri daş karxanaları və sement zavodlarını hədəfə alıb. İsrail qırıcıları Nəbatiyyədəki Rumin ilə Humin yaşayış məntəqələri arasındakı bir bölgəyə hava zərbəsi endirib. İsrailə məxsus pilotsuz uçuş aparatı (PUA) Fəvqa qəsəbəsinin şimal hissəsində yerləşən Əli ət-Tahir bölgəsinə hücum edib. İsrail döyüş təyyarələri Saydadakı Bənaful yaşayış məntəqəsinə iki, Sərəfənd ilə Bəysəriyyə arasındakı Hərbə Duveyr bölgəsinə bir hava zərbəsi endirib.

Digər tərəfdən, İsrailə məxsus PUA Şərqiyyə və Qusriyyə əs-Sayyad yaşayış məntəqələri arasındakı yolu idarəolunan raketlə hədəfə alıb; hücum nəticəsində yolda böyük çuxur yaranıb. Mərcəyunda İsrail PUA-sı yerli əhalinin zeytun yığımı ilə məşğul olduğu zamanlarda Bilida qəsəbəsinə hücum edib. İsrailə aid PUA həmçinin Bint Cubeyl bölgəsindəki Deyr Antar qəsəbəsinə də zərbə endirib. İsrail döyüş təyyarələri Baalbek bölgəsindəki Şəmstar qəsəbəsinin ətrafına da hava zərbəsi endirib.

DAŞ KARXANASI DA VURULDU İsrail ordusu verdiyi açıqlamada "Hizbullah"ı və Livanın "Sərhədsiz Yaşıllar" (GWB) ətraf mühit təşkilatını hədəfə aldığını iddia edib. Qeyd olunub ki, İsrailin hücumları nəticəsində Livanda dağılmış ərazilərdə "Hizbullah"ın yenidənqurma məqsədilə sement istehsalı üçün istifadə etdiyi daş karxanası da vurulan nöqtələr arasındadır. Hədəfə alınan GWB-yə məxsus obyektlərin də bərpa üçün istifadə olunan qurğular olduğu bildirilib. İsrail ordusu həmçinin Bəqa Vadisində (şərqdə) və Livanın cənubunda silah saxlamaq üçün istifadə olunan "Hizbullah"a məxsus yeraltı terror obyektlərinə basqın edildiyini iddia edib.

İSRAİL OKTYABRDA DA LİVANI VURMUŞDU İsrail 2023-cü ilin oktyabrında Livana qarşı hücumlara başlamış, 2024-cü ilin sentyabrında bu hücumlar genişmiqyaslı müharibəyə çevrilmişdi. Sözügedən müharibədə 4 mindən çox insan həyatını itirmiş, təxminən 17 min nəfər yaralanmış və 19 nəfər həbs edilmişdi. 2024-cü ilin noyabrında "Hizbullah" ilə İsrail arasında əldə olunmuş atəşkəs razılaşmasına baxmayaraq, İsrailin razılaşmanı 4500-dən çox dəfə pozduğu, bu pozuntular nəticəsində isə yüzlərlə mülki vətəndaşın öldüyü və yaralandığı bildirilir. İsrail, həmçinin son müharibədə ələ keçirdiyi beş Livan təpəsini hələ də işğal altında saxlayır, eyni zamanda onillərdir nəzarətində saxladığı bəzi bölgələrdəki mövcudluğunu davam etdirir.