İranlı komandan İsmail Kaani haqqında edam iddiaları: Rəsmi Tehran nə deyir?

Dünya fevralın 28-nə ABŞ və İsrailin İrana qarşı birgə həyata keçirdiyi genişmiqyaslı hücum xəbərləri ilə başlayıb. Bu hücumlar zamanı ölkənin ali rəhbəri Ayətullah Xamenei başda olmaqla, bir çox yüksək vəzifəli şəxsin həyatını itirdiyi bildirilir. Hadisələrin ən diqqətçəkən tərəfi isə bu ağır zərbədən sağ çıxan yeganə şəxsin kimliyidir. İran İnqilabı Keşikçiləri Korpusunun Qüds Qüvvələrinin komandanı İsmail Kaani bu hücumdan xilas olmağı bacaran tək isim olub. Onun belə bir vəziyyətdən sağ çıxması beynəlxalq səviyyədə müxtəlif sualların yaranmasına səbəb olub.

İsmail Kaani üçün bu, ilk belə hadisə deyil. O, keçən illər ərzində İsrail tərəfindən təşkil edilən daha iki hücumdan da sağ çıxmağı bacarmışdı. Ard-arda baş verən bu xilas olma hadisələri komandan haqqında casusluq şübhələrini artırıb. 2020-ci ildə öldürülən Qasım Süleymaninin yerinə gələn və xarici əməliyyatlara rəhbərlik edən Kaani özü haqqındakı iddialara münasibət bildirib. O, yaxın gələcəkdə bütün həqiqətlərin üzə çıxacağını qeyd edərək ona qarşı yönələn ittihamları rədd edib.

Hadisələrin gedişində daha bir sensasiyalı məlumat ortaya çıxıb. İddialara görə, İsmail Kaani dindirildikdən sonra İran İnqilabı Keşikçiləri Korpusu tərəfindən edam edilib. Bu xəbər qısa zamanda gündəmi zəbt etsə də, rəsmi dairələrdən cavab gecikməyib. İran rəsmiləri bu məlumatı qəti şəkildə yalanlayıb və komandanın taleyi ilə bağlı yayılanların həqiqəti əks etdirmədiyini bildiriblər. Hazırda bölgədə gərginlik davam edir və bu cür xəbərlər vəziyyəti daha da mürəkkəbləşdirir.