İranla qarşıdurmada həlak olan ABŞ əsgərlərinin kimliyi bəlli oldu: Sosial mediada etiraz dalğası

Yaxın Şərqdə diplomatik əlaqələr yerini qarşılıqlı hərbi zərbələrə verib. İranın dini lideri Əli Xameneyi və bəzi yüksək rütbəli şəxslərin həyatını itirməsi ilə nəticələnən hücumlardan sonra Tehran rəhbərliyi qisas əməliyyatına başladığını elan edib. İran tərəfi İsrailə və Fars körfəzində yerləşən ABŞ hərbi bazalarına raket hücumları təşkil etdiyini açıqlayıb. Bu hadisələr bölgədəki gərginliyi tamamilə yeni və təhlükəli bir səviyyəyə qaldırıb.

İran rəhbərliyi xüsusilə Qətərdə yerləşən Əl-Udeid hərbi bazasını hədəf aldığını və orada 200-dən çox Amerika əsgərinin öldüyünü iddia edir. Bundan başqa, Bəhreyn və Omandakı strateji nöqtələrin, o cümlədən Sultan Qabus limanındakı ticarət kompleksinin hədəfə alındığı bildirilir. Lakin ABŞ rəsmiləri bu iddialarla bağlı hələlik geniş bir açıqlama verməyib. Ağ Ev rəhbərliyi, itki xəbərlərinin və əsgər fotolarının yayılmaması istiqamətindəki ehtiyatlı siyasətini davam etdirir.

Pentaqon Küveytə edilən hücum nəticəsində həyatını itirən dörd Amerika əsgərinin adını rəsmən açıqlayıb. Onlar Florida ştatından 35 yaşlı Kapitan Kodi A. Kork, Nebraska ştatından 42 yaşlı Baş çavuş Noa L. Titjens, Minnesota ştatından 39 yaşlı Baş çavuş Nikol M. Amor və Ayova ştatından olan 20 yaşlı çavuş Deklan J. Koadidir. Hərbçilərin kimliyi müəyyən edildikdən sonra Amerika ictimaiyyəti bu itkilərə kəskin reaksiya verməyə başlayıb.

Əsgərlərin fotoları sosial şəbəkələrdə yayıldıqdan sonra bir çox amerikalı istifadəçi Tramp administrasiyasının siyasətinə etiraz edib. Şərhlərdə ən çox rast gəlinən fikir budur ki, bu gənc insanlar Amerika üçün deyil, İsrailin maraqları naminə canlarından keçiblər. İnsanlar öz vətəndaşlarının uzaq ölkələrdəki münaqişələrdə qurban verilməsindən narazıdırlar. Bu vəziyyət ölkə daxilindəki siyasi mübahisələri daha da kəskinləşdirib və xarici siyasət kursunun yenidən müzakirəsinə yol açıb.