İranın Texnologiya Sərgisində Şok: "Robot" Geyimli İnsanlar Dünya Gündəminə Düşdü

İranda keçirilən 2025 Kish Inox Tech Sərgisində baş verən hadisə qısa müddətdə dünya mediasının diqqətini çəkdi. Sərgidə "qabaqcıl texnologiya məhsulu" kimi təqdim edilən "insanabənzər robotlar" əslində xüsusi kostyum geyinmiş aktyorlar idi. Robot kimi təqdim edilən bu fiqurların naxışlı tulumlar, eynəklər və makiyajla səhnəyə çıxan şəxslərdən ibarət olduğu üzə çıxdıqdan sonra, vəziyyət sosial mediada lağ obyektinə çevrildi.

Sərgi ziyarətçiləri və videoları araşdıran sosial media istifadəçiləri "robotların" insan olduğunu çox tez anladılar. İnsan bədəninə məxsus olan duruş tərzi, üzdəki sızanaq izləri kimi aydın detallar, təbii göz qırpmaları və mütəmadi nəfəsalma performansı nümayiş etdirənlərin robot deyil, makiyajlı insanlar olduğunu açıqca ortaya qoydu. Tədbirdən yayılan videolarda, bir kişi və bir qadın aktyorun mexaniki hərəkətlərlə səhnəyə çıxaraq robot varlıqlar kimi təqdim edildiyi görünür. İkilinin özlərini "ümumi məlumat kodu daxilində çalışan bir məlumat toplusu" kimi təsvir etməsi də çox qəribə qarşılandı.

Sözügedən görüntülər qısa zamanda sosial media platformalarında sürətlə yayıldı. Hadisənin əsl mahiyyəti bütün dünyaya yayıldıqca, bu felyetonu xatırladan vəziyyət xüsusilə texnologiya həvəskarları arasında gülüş doğurdu. İstifadəçilər həm aktyorların görünüşünü, həm də şounun həqiqiliyini sorğularkən, bir çox insan onların insan olduğunu göstərən açıq-aşkar detallara diqqət çəkdi. Videokliplər paylaşılmağa davam edir və sosial media istifadəçiləri görüntülərə öz şərhlərini və yumoristik paylaşımlarını əlavə edərək bu mövzunu gündəmdə saxlayırlar. Bu vəziyyət texnoloji iddiaların həqiqəti ilə bağlı ciddi suallar yaratdı.