Hərbi Prokurorluq 106 illik yubileyini qeyd etdi
Azərbaycan Respublikasının Hərbi Prokurorluğu, 106 illik yubileyini qeyd etdi.
26 sentyabr tarixində Azərbaycan Respublikası Hərbi Prokurorluğunun mərkəzi aparatında, milli prokurorluq orqanlarının yaradılmasının 106-cı ildönümü münasibəti ilə tədbir keçirilib. Tədbirdə Respublika Hərbi Prokurorluğu, Bakı Hərbi Prokurorluğu əməkdaşları və prokurorluğun veteranları iştirak edib.
Tədbir iştirakçıları əvvəlcə Hərbi Prokurorluğun inzibati binasında yerləşən "Heydər Əliyev guşəsi"ndə Ümummilli Liderin büstü önünə gül dəstələri düzüb, ona dərin ehtiramlarını ifadə ediblər. Daha sonra, ölkənin ərazi bütövlüyü uğrunda şəhid olanların xatirəsi bir dəqiqəlik sükutla yad edilib və bütün qazilərə şəfa dilənib.
Azərbaycan Respublikası Baş Prokurorunun müavini - Azərbaycan Respublikasının Hərbi Prokuroru, ədliyyə general-leytenantı Xanlar Vəliyev, tədbir iştirakçılarını 1 oktyabr - prokurorluq işçilərinin peşə bayramı günü münasibəti ilə təbrik edərək, onlara xoş arzularını çatdırıb. Xanlar Vəliyev, Azərbaycan prokurorluq orqanlarının 80 il ərzində dövlətin etibarlı sütunlarından biri kimi fəaliyyət göstərdiyini, lakin prokurorluq işçilərinin peşə bayramının dövlət səviyyəsində qeyd edilməsinin yalnız Ulu Öndər Heydər Əliyevin 1998-ci il iyulun 17-də imzaladığı Sərəncamla mümkün olduğunu bildirib. Bu Sərəncamın, prokurorluğa dövlət səviyyəsində göstərilən qayğının ifadəsi olduğunu vurğulayıb.
Hərbi Prokuror Xanlar Vəliyev, Azərbaycan Prezidenti İlham Əliyevin rəhbərliyi ilə ölkəmizdə bütün sahələrdə əldə olunan böyük uğurlardan, Vətən müharibəsində qazanılan tarixi Qələbədən, dünyada analoqu olmayan uğurlu antiterror əməliyyatlarından və xalqımızın maddi və sosial rifah halının davamlı yaxşılaşdırılmasından danışıb. Bu uğurların, müdrik rəhbər, Müzəffər Ali Baş Komandan İlham Əliyevin dühası, sarsılmaz qətiyyəti, yorulmaz fəaliyyəti, xalqımızın əzmkarlığı və mübarizliyi, sarsılmaz xalq-iqtidar birliyi sayəsində mümkün olduğunu qeyd edib.
Xanlar Vəliyev, ölkəmizin hərtərəfli inkişafına və qazanılan ardıcıl uğurlara, bütün dünya qadınlarına örnək olan Azərbaycan Respublikasının Birinci vitse-prezidenti Mehriban xanım Əliyevanın çoxşaxəli fəaliyyətinin misilsiz töhfələr verdiyini vurğulayıb. Prokurorluğa və Hərbi Prokurorluğa dövlət səviyyəsində göstərilən diqqət və qayğının, işin səmərəliliyini şərtləndirdiyini qeyd edib.
Tədbirin sonunda, xidməti vəzifələrini nümunəvi icra etdiklərinə görə mükafatlandırılmış prokurorluq əməkdaşlarının bir qisminə Hərbi Prokuror tərəfindən təltiflər, prokurorluğun bir qrup veteranlarına isə hədiyyələr təqdim olunub.
Hərbi prokuror Xanlar Vəliyev tədbirə yekun vuraraq, Hərbi Prokurorluq orqanları əməkdaşlarının Prezident İlham Əliyevin rəhbərliyi ilə ölkədə görülən böyük işlərdə və həyata keçirilən məhkəmə-hüquq islahatlarında yaxından iştirak edəcəklərini, qanunçuluğun, dövlətçiliyin, ictimai-siyasi sabitliyin qorunması, qanunun aliliyinin təmin edilməsi üçün əllərindən gələni əsirgəməyəcəklərini, cinayətkarlığa eləcə də dövlətimizin qüdrətlənməsinə və milli maraqlara xələl gətirə biləcək bütün hallara qarşı barışmaz mövqe tutaraq, üzərilərinə düşən bütün vəzifələri ləyaqətlə yerinə yetirəcəklərini bildirib.
