Əsədin Son Çarəsi: Danışıqlar Masasına

Suriyada müxaliflərin sürətli irəliləyişi və ordusunun dağılması ilə üzləşən Bəşər Əsəd, nəhayət, danışıqlar masasına əyləşməyə razılıq verib. Bloomberg agentliyinin verdiyi məlumata görə, Əsəd siyasi müxalifətlə görüşəcək və yeni konstitusiya əsasında yeni bir prosesə başlamağı təklif edib.

Maraqlı bir məqam da Türkiyə ilə bağlıdır. Məlumatlarda Əsəd hökumətinin milyonlarla suriyalı qaçqının geri qayıtması ilə bağlı Türkiyənin tələblərini qarşılamağa hazır olduğu bildirilir.

Lakin Əsədin iki şərti var: birincisi, Suriyadan təhlükəsiz şəkildə çıxması; ikincisi isə, hazırda nəzarət etdiyi ərazilərin ona qalması təmin olunmalıdır. Həmçinin, Əsədin hazırda İranda olduğu ehtimal edilir.

Digər tərəfdən, Darayya, Kesva, Sahnaya, Muazamiye, Harcele və Cərəmə kimi ərazilərdən rejim qüvvələrinin çıxarılması, Əsədin posterlərinin yandırılması və heykəllərinin sökülməsi xəbərləri yayılıb. Müxaliflər Şamın Dımeyr, Sakba, Misraba və Maarba rayonlarını ələ keçirib. Şamın bəzi məhəllələrində rejim əleyhinə etiraz aksiyaları baş verib və rejim tərəfdarları etirazçılara atəş açıblar.

Haləb vilayətinin qərb ətrafında 27 noyabrda başlayan döyüşlərdən sonra, müxaliflər 30 noyabrda Haləbin böyük hissəsini, həmçinin bütün İdlibi ələ keçirib, 5 dekabrda isə Hama şəhərini nəzarətlərinə alıblar. Həmçinin, strateji əhəmiyyətli Hums vilayətinin bəzi ərazilərinin, Dera və Suveyda vilayətlərinin, eləcə də Quneytra şəhərinin də müxaliflərin nəzarətinə keçməsi xəbər verilir. Suriyanın Milli Ordusunun isə Tel Rıfatı azad etdiyi bildirilir.