Epşteyn qalmaqalı: Prens Endryunun son fəxri titulları da ləğv edildi, adı rəsmi qeydlərdən silindi

Böyük Britaniya Kral Ailəsini illərdir silkələyən Epşteyn böhranında yeni və həlledici mərhələyə keçilib. Şahzadə Endryu (Andrew Mountbatten-Windsor) mübahisəli əlaqələri səbəbiylə əlində qalan son fəxri titullardan da məhrum edilib. Kral III Çarlzın birbaşa göstərişi ilə Endryunun "Dizbağı Nişanı" və "Kraliyyət Viktoriya Nişanı" ləğv edildi. Bu qərarla onun adı rəsmi qeydlərdən tamamilə yığışdırılıb və bu, Endryunun kral ailəsindəki rolunun faktiki sonu hesab olunur. Məsələ, onun adı ilə bağlı bütün rəsmi izlərin silinməsi ilə nəticələnib.

Birləşmiş Krallığın rəsmi nəşr orqanı olan “The Gazette”də yayımlanan rəsmi bildirişdə, Endryunun nəinki Dizbağı Nişanı Cəngavər Yoldaşı, həm də Kraliyyət Viktoriya Nişanı Böyük Xaç Cəngavəri titullarının qüvvədən düşdüyü açıqlanıb. Məlumatlara görə, Şahzadə Endryu Albert Kristian Edvard Mauntbatten-Vindzorun 23 aprel 2006-cı il tarixli Dizbağı Nişanı Cəngavər Yoldaşı təyinatı və 19 fevral 2011-ci il tarixli Kraliyyət Viktoriya Nişanı Böyük Xaç Cəngavəri təyinatı ləğv edilərək, rəsmi qeydlərdən silindi. Qeyd edək ki, Dizbağı Nişanı İngiltərənin ən qədim və nüfuzlu cəngavərlik fəxri sayılır; Kraliyyət Viktoriya Nişanı isə hökmdarın şəxsi sərəncamı ilə verilən xüsusi bir mükafatdır. Bu qərarlardan sonra Prens Endryunun gerbi (arması) də Vindzordakı Müqəddəs Georgi Kilsəsindən (St. George Şapeli) qaldırılıb.

65 yaşlı keçmiş şahzadə həm "Əlahəzrət" (Majesteleri), həm də "Şahzadə" adlarını ötən ay itirmişdi. Hazırda o, texniki cəhətdən Kraliyyət Hərbi Dəniz Qüvvələrində vitse-admiral rütbəsini daşıyır. Ancaq Müdafiə Naziri Con Hili (John Healey) bu hərbi statusun da Bakinqem Sarayı ilə müzakirə edildiyini deyib. Bu, onun hərbi rütbəsinin də qorunub-saxlanılmasının sual altında olduğunu göstərir. Endryu, Epşteyn qalmaqalı səbəbilə ictimai təzyiq nəticəsində əvvəlcə kral vəzifələrindən uzaqlaşmağa məcbur olmuşdu.

Bütün fəxri adlarını itirdikdən sonra Endryunun Vindzordakı Kraliyyət Lojası (Royal Lodge) iqamətgahını tərk edəcəyi açıqlanıb. Saray mənbələri bildirir ki, o, yeni ildə Norfolk əyalətində yerləşən Sandrinqemə köçəcək. Bütün bunlara baxmayaraq, Endryu, Epşteyn tərəfindən qaçırıldığı iddia edilən Virciniya Ciufrinin (Virginia Giuffre) cinsi təcavüz ittihamlarını rədd etməyə davam edir. Lakin Ciufrinin ölümündən sonra nəşr edilən xatirə kitabı və ABŞ-ın Epşteynin miras sənədlərini açıqlaması son həftələrdə Endryu mövzusunun yenidən geniş müzakirələrə səbəb olmasına gətirib çıxarmışdı.