Elon Maskın sərvəti rekord həddə çatdı

Elon Mask, Donald Trampın qələbəsindən ən çox faydalananlardan biri oldu. Tesla şirkətinin səhmlərindəki kəskin artım Maskın sərvətini rekord həddə - təxminən 348 milyard dollara çatdırdı. Bu, Bloomberg Milyarderlər İndeksinə əsasən hesablanıb.

Trampın ən böyük tərəfdaşı sayılan Mask, seçki kampaniyasına 130 milyon dollardan çox vəsait ayırmışdı. Seçkidən sonra Maskın sərvəti 84 milyard dollar artdı. 5 Noyabr tarixinə olan məlumata görə, onun ümumi sərvəti 264 milyard dollar idi.

Tesla səhmlərindəki yüksəliş Maskın sərvətinə əhəmiyyətli təsir göstərdi. Səhmlərdəki 3,8 faizlik artım onun var-dövlətinə daha da əlavə etdi. Bundan əlavə, xAI süni intellekt şirkəti 5 milyard dollar investisiya cəlb etdi və şirkətin dəyəri 50 milyarda çatdı. Dünyanın ən varlı adamı olan Maskın sərvəti bu il 119 faiz artdı.

Sərvət siyahısında ikinci yerdə Amazonun qurucusu Jeff Bezos 219 milyard dollarla yer alır. Analitiklər hesab edirlər ki, Trampın prezident seçilməsi Tesla üçün əlverişli şərait yaradacaq və bu, səhmlərin qiymətinə müsbət təsir göstərəcək.