Dünya Osimhendən danışır

Nigeriya Yığma Komandasının Dünya Çempionatı Afrika Seçmə Mərhələsində Benini 4-0 hesabı ilə məğlub etdiyi matçda üç qol vuran Viktor Osimhen, oyunun əsas qəhrəmanı oldu. Bu qələbə ilə Nigeriya Pley-Off mərhələsinə vəsiqə qazanaraq böyük uğura imza atdı. "Qalatasaray"ın ulduzunun çıxışı dünya mətbuatında geniş müzakirə olunur. "Qalatasaray" klubu da sosial media hesablarından ulduz oyunçusunu "Təbrik edirik, Osimhen!" mesajı ilə təbrik etdi.

"DÜNYANIN ƏN YAXŞI HÜCUMÇUSU" Nigeriyanın baş məşqçisi Erik Çelle (Eric Chelle) qarşılaşmadan sonra verdiyi açıqlamada oyunçularına təriflər yağdırdı. Çelle, "Oyunçularım üçün çox sevinirəm... Xüsusilə də dünyanın ən yaxşı hücumçusu Viktor Osimhen üçün" sözləri ilə Osimheni tərifləyib göylərə qaldırdı. Çelle komandanın sükanı arxasına keçdiyi gündən bəri keçirdiyi 6 oyunda 4 qələbə və 2 heç-heçə qazanaraq Nigeriyanı yenidən ayağa qaldırıb.

DÜNYA MƏTBUATINDAN TƏRİFLƏR: DAYANDIRILA BİLMƏZ. Osimhenin çıxışı təkcə Nigeriyada deyil, İtaliya və İngiltərə mətbuatında da geniş işıqlandırıldı. BBC-nin müxbiri Con Bennet (John Bennett) ulduz oyunçu haqqında deyib: "Viktor Osimhen müdafiəçinin qorxulu yuxusu olmaq üçün hər şeyə malikdir. Nigeriya üçün yenə möhtəşəm performans nümayiş etdirdi. Osimhen dayandırıla bilməz. Təəssüf edirəm ki, o, Premyer Liqada oynamır, çünki orada böyük təsir yarada bilərdi".

AKOR ADAMS-DAN HİSS DOLU PAYLAŞIM. Eyni dövrdə "Sevilya"nın nigeriyalı mərkəz hücumçusu Akor Adams sosial media hesabında Osimhen haqqında xüsusi bir mesaj yayımladı. Osimhen ilə aralarındakı şəxsi yazışmanı paylaşan Adams, Osimhenin çətin günlərində onu necə həvəsləndirdiyini danışdı. Adams, "Pis günlərlə necə bacarırsan?" sualına Osimhenin verdiyi cavabı paylaşıb: "Qardaşım, pis günlər həmişə olacaq, lakin sənin yapışmalı olduğun şey malik olduğun keyfiyyət və qazanmaq istəyidir. Mən heç vaxt tənqidlərin məni ruhdan salmasına imkan verməmişəm. Allaha güvən, özünə inan. Pis günlər səni sadəcə daha güclü edir."

"QALATASARAY"IN QÜRURU OLDU. "Qalatasaray" forması ilə də uğurlu performans göstərən Viktor Osimhen, həm klub, həm də yığma səviyyəsində formunun ən yüksək nöqtəsinə çatdı. Sarı-qırmızılı azarkeşlər sosial şəbəkələrdə ulduz futbolçunu "Dünyanın ən yaxşı hücumçusu" heşteqi ilə trendə çevirərkən, Osimhenin yüksəlişi bütün futbol dünyasında təqdir olunmaqda davam edir.