Donald Tramp Kanada ilə bütün ticarət danışıqlarını ləğv etdi: Səbəb Ronald Reyqan reklamı

ABŞ prezidenti Donald Tramp Kanadanın tarif əleyhinə yayımladığı bir reklama görə bu ölkə ilə bütün ticarət danışıqlarına dərhal son qoyduğunu bəyan edib. Trampın sözlərinə görə, bu reklam Kanadanın yolverilməz davranışını nümayiş etdirir və buna görə də danışıqların davam etdirilməsi mümkün deyil.

Tramp öz sərt mövqeyini cümə axşamı gecə "Truth Social" platformasında etdiyi paylaşımda ifadə edib. O, Kanadanın keçmiş ABŞ prezidenti Ronald Reyqanın tariflər haqqında mənfi fikirlər söylədiyi bir reklam yayımladığını bildirib. Tramp bu hərəkəti "iyrənc davranış" adlandırıb və yazıb: "Onların bu kobud hərəkətinə əsasən, Kanada ilə BÜTÜN TİCARƏT DANışıQLARI DƏRHAL LƏĞV EDİLİR." Bu qərar Birləşmiş Ştatlar və onun şimal qonşusu arasında iqtisadi gərginliyi xeyli artırır.

Qeyd edək ki, ABŞ prezidenti artıq Kanada idxalına 35% rüsum tətbiq etmişdi. Bununla belə, o, özünün ilk prezidentlik dövründə razılaşdırdığı Meksika və Kanada ilə sərbəst ticarət müqaviləsi olan USMCA çərçivəsinə düşən mallar üçün istisnalara icazə vermişdi. USMCA güzəştləri qüvvədə qalsa da, danışıqların tamamilə dayandırılması iki ölkə arasındakı gələcək iqtisadi əlaqələrə böyük təsir göstərəcək.