Diyanət İşləri Başçısı Arpaquş: Fələstin Hadisələri İslam Aləmini Təcili Öz Kökünə Qayıtmağa Çağırır

Diyanət İşləri Başçısı Safi Arpaquş bildirib ki, Fələstin və Qəzza bölgəsində baş verən hadisələr müsəlmanların elmi, fikri, siyasi, iqtisadi, hərbi və bu kimi fərqli sahələrdə əməkdaşlığı inkişaf etdirməkdən başqa çıxış yolu olmadığını göstərir. Onun sözlərinə görə, İslam aləmi təcili olaraq öz kökünə dönüş səfərinə başlamalıdır. Bu vacib çağırış Qaziantepdə Valilik, Böyükşəhər Bələdiyyəsi, Qaziantep İslam Elm və Texnologiya Universiteti və Şahinbəy Bələdiyyəsinin birgə təşkilatçılığı ilə keçirilən “İslam Dünyası Hara Gedir? Güclü Gələcək üçün Perspektiv” mövzulu forumda səsləndirilib. Forumda Safi Arpaquş, Qaziantep valisi Kamal Çeber, bir çox qeyri-hökumət təşkilatlarının nümayəndələri və akademiklər iştirak edib. Tədbirdə İslam aləminin yaşadığı problemlər və onların həll yolları müzakirə olunub. Arpaquş qeyd edib ki, maddi və mənəvi böhranların dünyanı bürüdüyü bir dövrdən keçirik. Sülhü qorumaq üçün yaradılmış beynəlxalq quruluşlar və hüquq sistemləri artıq təsirini itirib, yer üzü xaos və qarışıqlığa sürüklənib. Baş verənlər göstərir ki, güclünün zəifi əzdiyi bu dönəmdə bəşəriyyət xilas yolu axtarır.

Diyanət İşləri Başçısı Arpaquş İslam coğrafiyalarında yaşanan problemlərin mənbələrinə də toxunub, bildirib ki, müxtəlif səbəblərdən ağır müdaxilələrə məruz qalırlar. O vurğulayıb ki, hazırkı vəziyyət müsəlmanların sahib olduqları irsə qarşı ciddi zəiflik içində olduğunu göstərir. Xarici müdaxilələrin təsiri böyük olsa da, daxili dinamiklərin də əsas amil olduğunu unutmamaq lazımdır. Marjinal qrupların, terror təşkilatlarının və sui-istifadəçi strukturların səbəb olduğu fitnələr müsəlmanların inanc, duyğu və düşüncə dünyasında dərin ziddiyyətlərə yol açıb. Fərqliliklər daxildə davaya çevrilib. Arpaquşun fikrincə, İslam aləmi tək qalmaq və çarəsizlik hissindən qurtulmaq üçün öz imkan və potensialını anlamalıdır. Onlar öz problemlərinə Qurani-Kərim, sünnə və öz sivilizasiya köklərindən çıxış edərək həll tapmalıdırlar. Bunun üçün ilk növbədə, möhkəm bir metodologiyaya ehtiyac var.

Başçı Arpaquş, İslam aləminin elmi bilikləri sadəcə təqlid etmək kimi ağır bir xəstəlikdən qurtulmasının vacibliyini dilə gətirib. O, biliyi yenidən istehsal edib onu şüura çevirəcək işlərə sürət verilməsinin gərəkdiyini bildirib. Müsəlmanlar yalnız elmi, siyasi, iqtisadi və hərbi sahələrdə əməkdaşlıqlarını möhkəmləndirdikdə xarici müdaxilələrdən uzaqlaşa və öz iradələrini göstərə biləcəklər. Qaziantep valisi Kamal Çeber isə çıxışında bu fikirləri praktiki tərəfdən dəstəkləyərək, İslam dünyasının elm və bilik sahələrində özünü dünya ölkələrinə sübut etməsinin zəruri olduğunu qeyd edib. Vali nümunə olaraq İsrail baş naziri Netanyahuya işarə edərək, onun “Əlinizdəki telefonu biz hazırlayırıq” deməsini xatırladıb. Çeber vurğulayıb ki, əgər biz hər birimiz Qəzza şüarları atırıqsa, lakin mobil telefonlarımıza baxdığımızda heç bir müsəlman markası görmürüksə, bir neçə ildən sonra başqa Qəzzaları müzakirə etməli olacağıq. Buna görə də ölkə olaraq pilotsuz uçuş aparatları (PUA) və zərbə PUA-ları (SİHA) ilə əldə etdiyimiz uğurların hər sahədə özünü göstərməsinə çalışmalıyıq.