Çinin Yeni Nəqliyyat Gəmisi "Menqjou"nun İlk Kosmik Uçuşu 2026-cı İldə Planlaşdırılır

Çin özünün insanlı kosmik səyahətlərində istifadə etdiyi köhnə "Şenjou" nəqliyyat gəmisini əvəz etməsi gözlənilən yeni "Menqjou" fəza gəmisinin ilk uçuşunun 2026-cı ildə baş tutacağı rəsmən bildirilib. Çin İnsanlı Fəza Uçuşları Agentliyinin (ÇİFUA) yaydığı məlumata görə, "Menqjou-1" gəmisi Haynan Adasındakı Vençanq Kosmik Mərkəzindən "Long Marş-10A" raketi ilə fırladılacaq. Bu əsas sınaq uçuşu zamanı gəminin orbitdə fəaliyyət göstərən Tyanqonq Kosmik Stansiyasının əsas moduluna birləşməsi nəzərdə tutulur. Bu ilk səfərin başlıca məqsədi yeni kosmik gəminin ümumi sistem performansını yoxlamaqdan və stansiyaya zəruri təcrübə avadanlıqları ilə təchizat materialları daşımaqdan ibarət olacaq.

Çin dilində mənası "Arzu gəmisi" olan Menqjou, ölkənin fəza proqramının kadr daşıyıcısı olaraq dizayn edilib. Bu gəmi taykonotları Kosmik Stansiyaya çatdırmaqla yanaşı, Ay kimi daha uzaq kəşfiyyat missiyalarına aparmaq üçün də istifadə ediləcək. Menqjou iki fərqli modeldə hazırlanacaq və Çinin hazırda personal daşımaq üçün istifadə etdiyi "Şenjou" (Müqəddəs gəmi) nəqliyyat vasitələrini tamamilə əvəz edəcək. Gözlənilən texniki parametrlərinə görə, bu yeni personal gəmisi 9 metr uzunluğunda, 4,5 metr enində və 22 ton ağırlığında olacaq. Menqjou eyni anda 3 taykonotu daşımaq qabiliyyətinə malik olacaq ki, bu da Çinin gələcək fəza missiyaları üçün böyük əhəmiyyət daşıyır.

Həmçinin, ÇİFUA 2026-cı ildə planlaşdırılan digər əhəmiyyətli kosmik səfərlər barədə də məlumat yayıb. Bu çərçivədə, kosmik stansiyaya personal daşınması məqsədilə "Şenjou-22" və "Şenjou-23" uçuşları, eləcə də təchizat məqsədi daşıyan "Tyenjou-10" yük səfəri həyata keçiriləcək. Qeyd olunur ki, Şenjou tipli gəmilər ölkənin şimal-qərbində yerləşən Ciuçüen Kosmik Mərkəzindən, Tyenjou yük gəmisi isə Menqjou kimi Haynan Adasındakı Vençanq Mərkəzindən fırladılacaq. Məlumat üçün əlavə edək ki, dünən gecə Tyanqonq stansiyasında xidmət edəcək yeni taykonot heyətini daşıyan "Şenjou-21" gəmisi "Long Marş 2F" raketi ilə Ciuçüen Peyk Mərkəzindən buraxılmışdı. Taykonotlar Canq Lu, Vu Fey və Canq Honqcanqı daşıyan bu gəmi, cəmi 3,5 saatlıq uçuşdan sonra kosmik stansiya ilə müvəffəqiyyətlə birləşmişdi.