Burkina Faso lideri İbrahim Traore İrana hərbi dəstək verməyə hazır olduğunu açıqladı

Yaxın Şərqdə gərginlik yüksək səviyyəyə çatdığı bir vaxtda Burkina Faso lideri İbrahim Traore diqqət çəkən bəyanatla çıxış edib. Amerika Birləşmiş Ştatları və İsrailin İrana qarşı başlatdığı hücumlar fonunda Traore açıq şəkildə Tehranın tərəfində olduğunu bildirib. O qeyd edib ki, əgər İran tərəfi rəsmi müraciət edərsə, Burkina Faso bu ölkəyə hərbi qüvvə göndərməyə tam hazırdır. Hazırda İran və İsrail arasındakı qarşıdurma dördüncü gününə daxil olub, İranda ölənlərin sayı isə 787 nəfərə yüksəlib. Traore çıxışında Qərb dövlətlərinin, xüsusilə ABŞ-ın cəzasızlıq dövrünün artıq bitdiyini vurğulayıb.

İbrahim Traore həm öz ölkəsində, həm də bütün Afrika qitəsində imperializmə qarşı mübarizə rəmzi hesab olunur. Bir çox insan onu 1980-ci illərdə Burkina Fasonun ən parlaq dövrünü yaşadan əfsanəvi lider Tomas Sankaranın davamçısı kimi görür. O, ölkənin təbii sərvətlərini xarici güclərə deyil, yerli xalqın xeyrinə istifadə etməyi əsas hədəf seçib. Traore Fransanın müstəmləkəçilik siyasətinə qarşı kəskin mövqe tutaraq ciddi islahatlara başlayıb. Bu addımları ilə o, təkcə Burkina Fasonun deyil, bütün qitənin müstəqil gələcəyi üçün çalışan cəsarətli bir fiqura çevrilib.

Son üç il ərzində 37 yaşlı kaptan ölkəsindəki Qərb izlərini silmək üçün bir çox radikal addım atıb. Fransanın hərbi bazaları bağlanıb, Avropa şirkətlərinin qızıl mədənləri üzərindəki üstünlüyünə son qoyulub. Traore Qərblə məsafə saxlayaraq Türkiyə, Rusiya və Çin kimi ölkələrlə əlaqələri gücləndirməyə üstünlük verib. Müstəmləkə dövründən qalan küçə adlarını yerli adlarla əvəz edib və xaricdən gələn ikinci əl geyimlərin satışını qadağan edib. Ölkə daxilində isə nazir və deputatların maaşları azaldılaraq, sıravi işçilərin gəlirləri yüzdə 50 artırılıb. Eyni zamanda Burkina Faso beynəlxalq maliyyə qurumlarına olan borclarını tamamilə ödəyib.

Burkina Faso hazırda Niger və Mali ilə birlikdə Sahel Dövlətləri İttifaqını (AES) yaradaraq öz yolunu cızır. İqtisadi proqnozlar göstərir ki, aparılan islahatlar sayəsində ölkə iqtisadiyyatı 2025-2043-cü illər arasında sürətlə böyüyəcək. Bu inkişaf milyonlarla insanın yoxsulluqdan xilas olması və həyat səviyyəsinin yüksəlməsi mənasına gəlir. Traorenin bu hərbi və siyasi gedişləri Afrika ölkələrinin artıq kənar müdaxilələrə boyun əyməyəcəyini göstərir. Onun İrana dəstək bəyanatı da məhz bu müstəqil siyasətin bir hissəsidir. Regionda baş verənlər beynəlxalq münasibətlərdə yeni bir mərhələnin başladığından xəbər verir.