Berlində təmizlik qaydaları sərtləşdirildi: Siqaret kötüyünü yerə atanın cəriməsi 3000 Avroya çatır

Almaniyanın paytaxtı Berlində ətraf mühitin qorunması və şəhər təmizliyinin təmin edilməsi məqsədilə tətbiq edilən yeni qaydalara əsasən, zibil atan şəxslərə qarşı cəzalar kəskin şəkildə artırılıb. Xüsusilə siqaret kötüyünü yerə atan şəxslər üçün tətbiq edilən cərimə 250 avrodan başlayaraq 3 min avroya qədər yüksələ bilər.

Berlin Senatı tərəfindən təsdiqlənən bu yeni cərimə kataloqu Rəsmi Qəzetdə dərc edildikdən sonra artıq qüvvəyə minib. Əvvəlki tənzimləmələrdə siqaret qalıqlarının yerə atılmasına görə 80-120 avro arasında cərimə tətbiq olunurdusa, yeni qayda ilə bu rəqəm minimum 250 avroya çatdırılıb. Məqsəd, şəhər sakinlərinin ətraf mühitə daha həssas yanaşmasını təmin etmək və çirkliyi azaltmaqdır.

Yeni tənzimləmələr təkcə siqaret tullantılarını əhatə etmir, həm də digər kiçik zibillərin yerə atılmasına görə sərt sanksiyalar nəzərdə tutur. Plastik torbalar, birdəfəlik stəkanlar, içki qutuları və saqqız kimi tullantılara görə cərimələr 250-500 avro arasında müəyyənləşdirilib. Şüşə butulkaları və ya metal hissələri küçəyə atanlar 250-800 avro məbləğində cərimə ödəməli olacaqlar. Bundan əlavə, it nəcisini yığmayan heyvan sahibləri 100-350 avro məbləğində cərimələnəcəklər ki, bu da sahiblərin məsuliyyətini artırır.

Daha iri həcmli və ya xüsusi tullantı növləri üçün cəzalar daha ağırdır. Məsələn, mebel, yataq və ya uşaq arabası kimi böyük əşyaların küçəyə buraxılması 300-1500 avroya başa gələcək. Həcmi daha böyük olan zibil üçün cəza 4 min avroya çata bilər. Ən ciddi sanksiyalar isə xüsusi kateqoriyalı tullantılara aiddir: elektron tullantılara görə 1000-15 min avro, inşaat qalıqlarının qanunsuz atılması üçün isə 100 min avroya qədər cərimə tətbiq ediləcəyi bildirilir. Berlin bu sərt maliyyə tədbirlərindən istifadə edərək şəhərin təmizliyini və cəzaların çəkindiriciliyini gücləndirməyi hədəfləyir.