Ağ Ev Sözçüsü Jurnalistə Səs-Küyə Səbəb Olan Cavab Verib: "Anan Seçib"

Ağ Evin sözçüsü Karolin Livittin bir jurnalistə verdiyi qeyri-adi cavab ABŞ ictimaiyyətinin diqqət mərkəzinə çevrilib. Söhbət Prezident Donald Tramp və Rusiya Prezidenti Vladimir Putinin mümkün görüş yeri kimi Macarıstanın paytaxtı Budapeştin kim tərəfindən seçildiyi barədə soruşan jurnalistdən gedir. Livitt suala qısa və kəskin cavab verib: "Anan seçib". Bu hadisədən dərhal sonra Livitt həmin jurnalisti "Trampa hücum edən solçu aktivist" kimi xarakterizə edərək, vəziyyəti daha da gərginləşdirib.

Mübahisəli anlar "Haffinqton Post" nəşrinin müxbiri S.V. Deyt və Ağ Ev sözçüsü arasında baş verib. Jurnalistin "Budapeşti kim seçdi?" sualına cavab olaraq Livittin yuxarıda qeyd edilən reaksiyası ciddi tənqidlərə yol açıb. Cavabın ardından, Karolin Livitt ABŞ mərkəzli "X" sosial media platformasında yazılı bəyanat yayaraq mövqeyini əsaslandırıb. O, S.V. Deyti "uzun müddətdir Trampa hücum edən, Demokratların danışıqlarını təkrarlayan bir solçu aktivist" adlandırıb. Sözçü, özünü həqiqi jurnalist kimi göstərən aktivistlərin mətbuat peşəsinə zərər vurduğunu iddia edib. Bu açıqlama, medianın bitərəfliyi və siyasi tərəfkeşlik mövzularını bir daha qızışdırıb.

Əslində, jurnalist S.V. Deytin soruşduğu sualın arxasında dərin siyasi məna vardı. "Haffinqton Post"un 17 oktyabr tarixli məlumatına görə, müxbir Livittə göndərdiyi mesajda Budapeştin Ukraynada sülh danışıqları üçün seçilməsinin simvolik əhəmiyyət daşıdığını bildirmişdi. Deyt mesajında Ukraynanın nüvə silahlarından təmizlənməsindən sonra 1994-cü ildə Böyük Britaniya, ABŞ və Rusiya arasında imzalanan Budapeşt Memorandumunu xatırladıb. Bu tarixi sənəd Ukraynanın ərazi bütövlüyünə təminat verirdi. Jurnalist bu mühüm konteksti xatırlatdıqdan sonra Tramp-Putin görüşü üçün məhz bu şəhərin seçilməsi qərarının kimə aid olduğunu soruşmuşdu. Lakin Livitt bu əsaslandırılmış suala olduqca qeyri-ciddi və kobud bir cavabla reaksiya vermişdi.