1-ci Dünya Karakucak Güləş Çempionatı: Başpehlivan Feyzullah Aktürk Qalib Gəldi, Azərbaycan Üçüncü Oldu

Türkiyənin Kahramanmaraş şəhərində keçirilən 1-ci Dünya Karakucak Güləş Çempionatının ilk başpehlivanı (baş güləşçisi) Türkiyəni təmsil edən Feyzullah Aktürk olub. Ümumi komanda hesabında isə Türkiyə 90 xalla çempionluq kubokunu qazandı.

Dünya Karakucak Güləş Çempionatının bu ilk tədbiri Kahramanmaraş Batıpark Zəlzələ Şəhidləri Er Meydanında baş tutdu. Gənclər və İdman Nazirliyi, Kahramanmaraş Böyükşəhər Bələdiyyəsi və Türkiyə Ənənəvi Güləş Federasiyasının birgə əməkdaşlığı ilə təşkil edilən yarışda 16 ölkədən 107 idmançı iştirak etdi. Güləşsevərlərin tribunları tamamilə doldurduğu çempionatda idmançılar 9 müxtəlif çəki dərəcəsində mübarizə apardılar. Türkiyə 22 idmançı ilə çempionatda ən çox iştirakçı ilə təmsil olunan ölkə oldu. Qızğın mübarizə 9 saat davam etdi və sonunda qaliblər müəyyənləşdi.

Çempionat Feyzullah Aktürklə (Türkiyə) Mostafa Masoud Najafi Kalatehei (İran) arasındakı başpehlivanlıq mübarizəsi ilə sona çatdı. Gərgin keçən görüşdə Aktürk rəqibini məğlub edərək tarixə Dünya Karakucak Güləş Çempionatının ilk başpehlivanı kimi adını yazdırdı. Komanda sıralamasında Türkiyə 90 xalla birinci, Azərbaycan isə 46 xalla üçüncü yeri tutdu. Müsabiqənin sonunda dərəcəyə layiq görülən idmançılara medalları və qızıl kəmərləri Kahramanmaraş valisi Mükerrem Ünlüer, millət vəkilləri, bələdiyyə sədri Fırat Görgel və Dünya Güləş Birliyinin (UWW) nümayəndələri tərəfindən təqdim edildi. Bu idman növünün beynəlxalq səviyyədə yayılması üçün bu tədbir böyük əhəmiyyət daşıyır.

İlk Dünya Karakucak Başpehlivanı olan Feyzullah Aktürk, bu titulun məhz Türkiyədə, xüsusən də Kahramanmaraşda qazanılmasından qürur duyduğunu dilə gətirdi. Aktürk, bu şəhərin onun üçün xüsusi yerə sahib olduğunu qeyd etdi: "Bizim milli komanda qapılarımız 2016-cı ildə məhz Maraşda açıldı. Mən 2015-ci ildə ulduzlar kateqoriyasında buraya gəlmişdim. Bu mənada, ən yüksək kateqoriya adlanan başpehlivanlıq yarışında birinci olduğumuz üçün şərəf duyuruq. Ölkəmizin İstiqlal Marşını səsləndirdiyimiz üçün qürurluyuq." Kahramanmaraş Böyükşəhər Bələdiyyə Başçısı Fırat Görgel isə ilk dəfə keçirilən dünya çempionatının məhz onların şəhərində baş tutmasından məmnuniyyət duyduqlarını bildirdi: "Bu, hamımız üçün çox qürurverici bir gün idi. 'Ata idmanımız ana vətənindədir' şüarı ilə bu təşkilatı həyata keçirdik və inanıram ki, yaxşı qonaqpərvərlik nümayiş etdirdik."

Çempionatda bütün çəki dərəcələrində Türkiyə nümayəndələri qalib gəldi. Azərbaycan idmançıları da müxtəlif kateqoriyalarda yüksək nəticələr göstərdilər. Məsələn, 60 kq-da Soltan Əsgərov ikinci, 75 kq-da Hacalı Qasımov ikinci, başpehlivanlıq (+90 kq) kateqoriyasında isə Rəvan Musayev üçüncü yerə sahib oldu. Digər dərəcələr üzrə qaliblər bunlardır:

50-55 KİLO:
1) Halil Gökdeniz-Türkiyə
2) Bahri Söyler-Türkiyə
3) Həsən Nəzərov-Tacikistan
3) Abubakir Nemetov-Qırğızıstan

60 KİLO:
1) Əmircan Çolak-Türkiyə
2) Soltan Əsgərov-Azərbaycan
3) Əli Kurşun-Türkiyə
3) Şaban Kızıltaş-Türkiyə

75 KİLO:
1) Muhsin Barbak-Türkiyə
2) Hacalı Qasımov-Azərbaycan
3) Onur Şəkər-Türkiyə
3) Gabriel Ojog-Moldova

+90 KİLO - BAŞPEHLİVANLIQ:
1) Feyzullah Aktürk-Türkiyə
2) Mostafa Masoud Najafi Kalatehei-İran
3) Rəvan Musayev-Azərbaycan
3) Brian Samuel Techerean-Rumıniya