Bakıda WUF13: Azad edilmiş ərazilərdə yenidənqurma prosesi diqqət mərkəzində
Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində Azərbaycanın işğaldan azad edilmiş ərazilərində aparılan bərpa və tikinti işləri geniş müzakirə olunub. Prezidentin köməkçisi Hikmət Hacıyev bu işləri "böyük missiya" adlandırıb. Dövlət Şəhərsalma və Arxitektura Komitəsinin sədri Anar Quliyev isə bildirib ki, hazırda 40-dan çox kənddə inşaat işləri sürətlə davam etdirilir.
Şuşada 27 abidə bərpa edilib, Ağdam-Şuşa yolu tamamlanmaq üzrədir
Prezidentin Şuşa rayonunda xüsusi nümayəndəsi Aydın Kərimov WUF13 çərçivəsində açıqlayıb ki, Şuşada indiyədək 27 tarixi və mədəni abidə bərpa edilib. Eyni zamanda, Ağdərə və Xocalı rayonlarında Prezidentin xüsusi nümayəndəsi Elçin Yusubov bildirib ki, Ağdam-Şuşa avtomobil yolunun tikintisi yekunlaşmaq üzrədir. Bu yolun istifadəyə verilməsi bölgənin nəqliyyat infrastrukturunu əhəmiyyətli dərəcədə gücləndiləcək.
Xankəndinin yeni Baş planı 80 min nəfərlik olacaq, dəmiryol vağzalı 2027-də fəaliyyətə başlayacaq
Xankəndi şəhərinin yeni Baş planı hazırlanır və 80 min nəfərlik əhali üçün nəzərdə tutulur. Bunu da Elçin Yusubov WUF13-də açıqlayıb. Bundan əlavə, Xankəndi Dəmir Yolu və Avtovağzal Kompleksinin 2027-ci ildə istifadəyə verilməsi planlaşdırılır. Yusubov həmçinin bildirib ki, iş adamları tərəfindən Ağdam, Xocalı və Xankəndiyə indiyədək 100 milyona yaxın investisiya yatırılıb.
Bakının şəhərsalma modeli çoxmərkəzli struktura keçir
Rəqəmsal inkişaf və nəqliyyat naziri Rəşad Nəbiyev WUF13 çərçivəsində Bakının şəhərsalma strategiyası barədə danışıb. Nazir vurğulayıb ki, daha çox yol tikmək tıxac problemini avtomatik həll etmir və Bakı şəhərinin tək mərkəzli modeldən çoxmərkəzli modelə keçidi strategiya prioritetlərindən biri sayılır. Forum iştirakçıları həmçinin urbanizasiya proseslərində insan faktorunun əhəmiyyətini müzakirə ediblər - BMT-nin könüllülər təşkilatının koordinatoru Zarina Mirabdullayeva könüllülərin şəhər icmalarının modernləşmə prosesində əsas komponentlərdən biri olduğunu vurğulayıb.