WordPress Məhkəmə Çəkişməsi: Automattic WP Engine-i Ticarət Nişanından Sui-İstifadədə İttiham Edir

WordPress platformasını yaradan "Automattic" şirkəti, 2024-cü ilin oktyabr ayında hostinq şirkəti WP Engine tərəfindən açılmış məhkəmə iddiasına qarşı əks iddialarını qaldırıb. WP Engine həmin iddia ilə Automattic-i və onun CEO-su Matt Mullenweq-i böhtan atmaqda və səlahiyyətdən sui-istifadə etməkdə günahlandırırdı. Lakin Automattic-in bu yeni hüquqi addımı, mübahisənin əsas səbəbinin başqa olduğunu göstərir. Automattic iddia edir ki, WP Engine "WordPress" ticarət nişanından sui-istifadə edib, aldadıcı marketinq taktikaları tətbiq edib və açıq mənbə (open source) cəmiyyətinə lazımi dəstək verməyib. Bu məhkəmə çəkişməsi texnologiya dünyasında iki böyük şirkətin münasibətlərinin necə kəskinləşdiyini ortaya qoyur.

Automattic-in WP Engine-ə qarşı reaksiyası hələ keçən il başlamışdı. Matt Mullenweq hostinq təminatçısını açıq şəkildə "WordPress üçün xərçəng" adlandırmışdı. Bundan əlavə, Automattic WP Engine-ə ticarət nişanından istifadə qaydalarını pozduğu üçün rəsmi xəbərdarlıq məktubu (cease-and-desist) göndərmişdi. Mübarizə daha da gərginləşdikcə, Automattic WP Engine-in WordPress.org resurslarına girişini tamamilə qadağan etdi. Automattic həmçinin WP Engine ilə lisenziya razılaşması əldə etməyə çalışmışdı, lakin şirkət bu danışıqların pis niyyətlə aparıldığını və WP Engine-in sadəcə vaxt uzatdığını bildirir. WP Engine-in özünü Mullenweq-in hücumlarının qurbanı kimi təqdim edərək məhkəməyə müraciət etməsinə baxmayaraq, Automattic başqa cür düşünür. Onların dediyinə görə, Silver Lake şirkətinin 250 milyon dollarlıq sərmayəsindən sonra, WP Engine "Ədalətli istifadə" çərçivəsindən kənara çıxaraq özünü "WordPress Texnologiya Şirkəti" adlandırmağa başladı və tərəfdaşlarına "WordPress Engine" kimi müraciət etməyə icazə verdi. Bu isə birbaşa ticarət nişanının pozulması deməkdir.

Automattic tərəfindən irəli sürülən əks iddialarda WP Engine-in qəsdən hərəkət etdiyi əsas gətirilir. Hostinq şirkəti "Core WordPress" və "Headless WordPress" kimi adlarla məhsullar da bazara çıxarmışdı. Həmçinin WP Engine müştərilərinə söz vermişdi ki, resurslarının 5%-ni WordPress ekosisteminə dəstək üçün ayıracaq, lakin Automattic bu vədlərin heç vaxt yerinə yetirilmədiyini deyir. Automattic hesab edir ki, WP Engine lisenziya müzakirələrində iştirak etməyi sadəcə təqlid edib və danışıqları pis niyyətlə yubadıb. Buna səbəb, lisenziya ödənişlərinin WP Engine-in gəlirlərinə və dəyərlənməsinə, xüsusən də Silver Lake-in gözlənilən qazancına mənfi təsir göstərəcəyi idi. Qeyd edilir ki, Silver Lake şirkəti WP Engine-i 2 milyard dollarlıq dəyərlə satmağa çalışırdı, hətta Automattic-ə də təkliflər göndərmişdi, lakin alıcı tapa bilməmişdi. Bu maliyyə çətinlikləri dövründə, Automattic-in iddiasına görə, WP Engine xərcləri azaltmaq məqsədilə vacib funksiyaları ləğv edərək müştəri təcrübəsini və məhsul keyfiyyətini qəsdən aşağı salmışdı.