Süni Zəka: Gözləntilərə Cavab Verməyən Texnologiya

Böyük Britaniyada aparılan araşdırma, şirkətlərin süni zəkaya etdiyi investisiyaların əksəriyyətinin gözlənilən faydaları gətirmədiyini ortaya qoyub. Məlumatlara görə, şirkətlərin yalnız 11 faizi süni zəka layihələrindən ölçülə bilən qazanc əldə etdiyini bildirib. Qalanları isə ya hələ də sınaq mərhələsindədir, ya da texniki, struktur və strateji problemlərlə üzləşir. Böyük ümidlər, az nəticə! Şirkətlər süni zəkadan nəyi əldə edə bilmirlər?

Qlik şirkətinin apardığı araşdırma, süni zəkadan əldə olunan faydanın, xüsusən də insan resursları və maliyyə şöbələrində olduqca məhdud olduğunu göstərib. İnsan resurslarının 37 faizi və maliyyə şöbələrinin 30 faizi süni zəkadan heç bir nəticə əldə etmədiklərini bildiriblər. Əksinə, İT və kiber təhlükəsizlik bölmələrində çalışan işçilərin 81 faizi süni zəkanın inkişaflara səbəb olduğunu bildirib.

Araşdırma, şirkətlərin əksəriyyətinin hələ də pilot mərhələdə olduğunu və bunun süni zəkanın təsirinin genişlənməsinin qarşısını aldığını göstərir. Respondentlərin 23 faizi şirkətdaxili süni zəka tətbiqlərinin əksəriyyətinin hələ də eksperimental xarakter daşıdığını bildirib. Şirkətlərin təxminən yarısı süni zəkanın gözlənilən səmərəliliyi ilə əldə olunan nəticələr arasında əhəmiyyətli bir fərq olduğunu etiraf edib. Ölçmə üsullarındakı uyğunsuzluq da diqqət çəkir. İştrakçıların 51 faizi süni zəka performansını birbaşa biznes nəticələri ilə əlaqəli klassik KPI-lər ilə qiymətləndirdiklərini bildirib. Bu, texnologiyanın yeni təbiəti və potensial töhfələri ilə uyğun olmayan ənənəvi performans ölçülərinin hələ də istifadə olunduğunu göstərir.

Eyni zamanda, əksər şirkətlərdə kifayət qədər texniki bacarıqların olmaması əhəmiyyətli bir problem kimi qeyd olunur. Araşdırmada iştirak edən şirkətlərin 49 faizi bu sahədə açıq çatışmazlığın olduğunu bildirib. Bundan əlavə, 36 faizi platformalar arası uyğunsuzluğu, 37 faizi isə real vaxt məlumat inteqrasiyasının olmamasını əsas maneə kimi qeyd edib. Araşdırma, texniki infrastruktur və məlumat strategiyasındakı çatışmazlıqların şirkətlərin süni zəkadan səmərə əldə edə bilməməsində birbaşa təsir göstərdiyini göstərib. Lakin, büdcə məhdudiyyətlərinin artıq bu prosesdə müəyyən edici amil olmadığı qeyd olunub. Səmərəliliyin olmamasının əsas səbəbi kimi təşkilati quruluş və məlumat arxitekturası göstərilib.

Şirkətlərin 89 faizi süni zəkaya investisiyaların qayıdışını düzgün qiymətləndirmək üçün vahid məlumat strategiyasının vacibliyini qəbul edib. Bundan əlavə, 57 faizi qabaqcıl məlumat inteqrasiya və təhlil vasitələrinin, 55 faizi süni zəka modellərinin qərar qəbuletmə proseslərinə daha çox şəffaflıq gətirdiyini, 49 faizi şöbələr arasında əməkdaşlığın və 46 faizi nəticəyönümlü performans göstəricilərinin səmərəli nəticələr üçün zəruri olduğunu bildirib. Araşdırma, mövcud vəziyyətin şirkətlər üçün "oyanış zəngi" olduğunu vurğulayıb. Şirkətdaxili inteqrasiya, məlumat infrastrukturu, dəqiq ölçmə sistemləri və əməkdaşlığa əsaslanan strategiyaların uğurlu nəticələr üçün vacib olduğu vurğulanıb. Texnologiyanın inkişafına baxmayaraq, süni zəkanın potensialından faydalana bilməyən şirkətlər sistemli dəyişikliklər etməsələr, investisiyalarını ölçülə bilən nəticələrə çevirə bilməzlər.