Nissanın Böyük Zavodu Bağlanır

Yaponiyanın ən qədim avtomobil istehsal müəssisələrindən biri olan Nissanın Oppama zavodunun fəaliyyətinin dayandırılması qərarı verilib. Şirkət 2027-ci maliyyə ilinin sonuna kimi zavodda istehsalın dayandırılacağını açıqlayıb. Bu qərar Nissanın hərtərəfli yenidən qurulma planı olan "Re:Nissan" çərçivəsində qəbul edilib.

Yokohamanın yaxınlığında, 1961-ci ildən bəri fəaliyyət göstərən Oppama zavodu təxminən 2400 nəfəri işlə təmin edir. Bluebird, Cube, Juke və birinci nəsil Leaf kimi bir çox ikonik modelin istehsal mərkəzi olmuş zavodda hazırda Note və Note Aura modelləri istehsal olunur. İstehsalın başa çatması ilə bu modellərin istehsalı 1976-cı ildən fəaliyyət göstərən Nissan Motor Kyushu zavoduna köçürüləcək.

Zavodun bağlanması ilə bağlı qərar ötən həftə Foxconn ilə elektrikli avtomobil istehsalı ilə bağlı müzakirələrdən sonra aydınlaşdı. Bu müzakirələrə baxmayaraq, istehsal gücünün azaldılması qərarı verildi. Şirkət bildirib ki, bu addım istehsal gücü, xərc effektivliyi və uzunmüddətli investisiya planları baxımından ən uyğun həlldir.

Oppama zavod kompleksi tamamilə bağlanmayacaq. Nissan Tədqiqat Mərkəzi, qəza sınaq müəssisəsi və zavod limanı kimi dəstək bölmələri fəaliyyətini davam etdirəcək. Şirkət zavodun gələcək istifadəsi üçün alternativ variantlar üzərində işləyir. Həmçinin, əməkdaşların vəziyyəti ilə bağlı həmkarlar ittifaqı ilə danışıqların davam etdiyi bildirilib.

"Re:Nissan" planı çərçivəsində Çin istisna olmaqla şirkətin qlobal istehsal gücü 3,5 milyondan 2,5 milyona endiriləcək. Bununla əlaqədar olaraq, dünya üzrə istehsal müəssisələrinin sayı 17-dən 10-a endiriləcək. Şirkətin məqsədi qalan müəssisələrdən maksimum istifadə etməkdir. Nissanın baş direktoru İvan Espinosanın sözlərinə görə, bu qərar çətin, lakin qaçılmaz idi. Bəyanatda bu addımın mövcud iqtisadi təzyiqlərin qarşısını almaq və şirkətin davamlı gələcəyini təmin etmək üçün zəruri olduğu bildirilib.