NASA Yerə Təhlükə Yaradan Asteroidləri İzləyəcək Yeni Teleskop Hazırlayır

NASA-nın planetlərin müdafiəsi proqramı çərçivəsində hazırlanan NEO Surveyor teleskopu geniş miqyaslı sınaq və kalibrasiya prosesindən keçir. 2027-ci ildə orbitə çıxarılması planlaşdırılan bu missiya, Yer kürəsinə təhlükə yarada biləcək asteroidlərin aşkarlanması sahəsində əhəmiyyətli rol oynayacaq.

Hazırda mövcud müşahidə alətləri, xüsusilə də Günəşdən yaxınlaşan kiçik asteroidləri aşkarlamaqda çətinlik çəkir. Bu da bəzi yüksək təhlükəli asteroidlərin Yerdən keçdikdən sonra aşkarlanması kimi narahatedici nəticələrə səbəb olur. NEO Surveyor isə bu problemi aradan qaldırır. 50 santimetrlik diametri və infraqırmızı sensorları sayəsində Günəşdən əks olunan istiliyi qəbul edən və optik teleskoplar üçün görünməz olan qaranlıq asteroidləri də aşkarlaya bilir.

Teleskopun məqsədi 140 metrdən böyük olan Yerin yaxınlığındakı cisimlərin 90 faizini kataloqlaşdırmaqdır. Bu ölçüdə bir asteroidin təsiri regional miqyasda geniş dağıntılara səbəb ola bilər. Space Dynamics Laboratory missiya üçün öz infrastrukturunu yeniləyib. 2.4 x 4.27 metr ölçülərində olan NEO Surveyor aləti burada tam şəkildə yığılacaq və kalibrlənəcək, daha sonra kosmik aparatına inteqrasiya olunacaq. Son aylarda alətin bu obyektlərdə müxtəlif sınaqlardan keçirildiyi də bildirilir.

NASA, 2025-ci ilin fevral ayında bu missiyanın buraxılışı üçün SpaceX şirkəti ilə 100 milyon dollarlıq müqavilə imzalayıb. Teleskop 2027-ci ilin sentyabr ayından gec olmayaraq Florida ərazisindən Falcon 9 raketinin köməyilə orbitə çıxarılacaq. NEO Surveyor, Yer və Günəş arasındakı L1 Laqranj nöqtəsində yerləşəcək. Bu strateji mövqe, Günəşdən yaxınlaşan və Yerdən görünməyən səma cisimlərini fasiləsiz olaraq müşahidə etməyə imkan verəcək.