Hyundai Ioniq 6 N: Elektrikli Sürətin Yeni Simvolu

İngiltərənin Goodwood Sürət Festivalında təqdim olunan yeni Hyundai Ioniq 6 N, elektrikli avtomobil dünyasında əsl inqilab yaradır. Bu, şirkətin hazırkı ən güclü və texnoloji cəhətdən inkişaf etmiş elektrik modelinə çevrilib.

İki elektrik mühərriki ilə təchiz olunan Ioniq 6 N, ümumilikdə 601 at gücü və 740 Nm fırlanma anı təklif edir. "N Grin Boost" funksiyası aktiv olduqda isə bu göstəricilər 10 saniyə ərzində 641 at gücünə və 770 Nm fırlanma anına qalxır. Nəticədə, avtomobil 0-dan 100 km/s sürətə cəmi 3,2 saniyəyə çatır. Maksimum sürət isə 258 km/s-dir.

Yüksək performans yalnız mühərriklə məhdudlaşmır. Hyundai, Ioniq 6 N-in süspansiyon geometriyasını tamamilə yenidən işləyib. Yeni elektron idarə olunan amortizatorlar yol şəraitinə uyğun olaraq avtomatik olaraq süspansiyonu tənzimləyir. "N Drift Optimizer" və "N Torque Distribution" sistemləri isə avtomobilin həm yarış trassasında, həm də gündəlik istifadədə əla manevr etmə qabiliyyətinə sahib olmasını təmin edir.

Yüksək performanslı əyləc sistemi ön tərəfdə dörd pistonlu, arxa tərəfdə isə tək pistonlu kaliperlərlə təchiz olunub və 275/35R20 Pirelli P-Zero 5 təkərləri ilə dəstəklənir. Genişlənmiş qanadları və qu quşu boynu arxa spoyleri həm aerodinamik xüsusiyyətlərə, həm də idman görünüşünə töhfə verir.

Sürət və idarəetmədən əlavə, Hyundai sürücü ilə avtomobil arasında emosional əlaqəni gücləndirmək üçün bir sıra xüsusiyyətlər əlavə edib. "N e-Shift" sistemi elektrik avtomobilində dişli dəyişmə hissiyatını təqlid edərək ənənəvi sürüş vərdişlərini qoruyub saxlayır. Bu dəyişikliklər avtomobilin daxili işıqlandırılması ilə sinxronlaşdırılır. "N Active Sound+" isə üç fərqli süni mühərrik səsi təklif edir: "Ignition" (atəşləmə), "Evolution" (inqişaf) və "Lightspeed" (işıq sürəti).

WLTP ölçmələrinə görə Ioniq 6 N 468 kilometr məsafə qət edə bilir. Akkumulyator tutumu və qiyməti isə hələ açıqlanmayıb, lakin bazar mənbələri təxminən 60.000 dollarlıq başlanğıc qiymət gözləyirlər.