Mourinyonun əsəbləri pozulub

Dünya şöhrətli məşqçi Joze Mourinyo karyerasının ən çətin dövrünü yaşayır. “Fənərbaxça”dan qalmaqallı şəkildə ayrılan 62 yaşlı məşqçi Portuqaliyada da parlaq uğura imza ata bilmir. O, Türkiyə klubunu tərk edəndən sonra ötən ay "Benfika"nın baş məşqçisi təyin olunmuşdu. Lakin bu təyinatdan sonra da klub parlaq qələbələr qazana bilmir.

Mourinyonun rəhbərliyi altında "Benfika"nın yerli liqada "Rio Ave"yə qarşı ev matçında heç-heçə etməsindən sonra ictimaiyyətin vəziyyətə nəzarəti yenidən güclənib. Mətbuat "Benfika"nın keçirdiyi hər oyunu ciddi təftiş edir. Klub hazırda əsas rəqibi “Porto”dan dörd xal geridədir. Təcrübəli məşqçinin komandanı cəmi bir ay əvvəl qəbul etməsinə baxmayaraq, tərəfdarlar və media qısa müddətdə daha parlaq nəticələr gözləyirlər.

Uğursuzluqlar artdıqca Mourinyo isə başqalarını günahlandırmaqdan vaz keçmir. Məsələn, "Rio Ave" ilə qarşılaşmadan sonra o, matçın hakimini “şəxsiyyətsiz” adlandırmışdı. Yerli KİV bildirir ki, “Fənərbaxça”dan qalmaqallı şəkildə qovulandan sonra Joze Mourinyo ciddi əsəb sarsıntısı keçirir. Ardıcıl gələn uğursuz nəticələr və məşqçinin kəskin reaksiyaları göstərir ki, onun üzərindəki təzyiq getdikcə artır.