​Dəmir çatışmazlığının ilkin əlamətləri – bədən sizə siqnal verir

Dəmir orqanizmin əsas minerallarından biridir. O, qanın tərkibindəki hemoqlobinin yaranmasında böyük rol oynayır. Ancaq bir çox insan bu maddənin çatışmazlığını hiss etmədən uzun müddət yaşayır. Həkimlər xəbərdarlıq edirlər ki, dəmir çatışmazlığı vaxtında müəyyən edilməzsə, qanazlığı (anemiya) və digər ciddi problemlər yarada bilər.

Dəmir çatışmazlığının ən çox rast gəlinən əlaməti güclü yorğunluqdur. Dəmir az olduqda bədən hüceyrələrinə yetərli oksigen daşınmır. Nəticədə insan özünü səbəbsiz yorğun, halsız və gücsüz hiss edir. Bəzən adi pilləkən qalxmaq belə nəfəs darlığı yaradır; bu da mühüm xəbərdarlıq əlaməti sayılır. Qanda hemoqlobinin azalması ürəyin daha çox işləməsinə gətirib çıxarır. Bu vəziyyət isə ürək döyüntülərinin artması ilə müşahidə olunur.

Bədən dəmir ehtiyatını qorumaq üçün onu “ikinci dərəcəli” toxumalardan kənarlaşdırır. Bu səbəbdən fiziki görünüşdə dəyişikliklər baş verir. Dəmir çatışmazlığı olanda dırnaqlar kövrəkləşir və tez qırılır. Saçlar seyrəkləşir, parıltısını itirir. Hemoqlobinin azalması dərinin rəngini də dəyişir. Üz solğun görünür, xüsusilə dodaqlarda və göz qapaqlarının iç hissəsində bu solğun görünüş daha aydın hiss olunur. Bundan əlavə, beyinə kifayət qədər oksigen çatışmazlığı səbəbindən bəzən başgicəllənmə və diqqət dağınıqlığı yaranır.

Dəmir çatışmazlığı bəzi insanlarda qeyri-adi meyllər də yarada bilər. Bu vəziyyət “pika sindromu” adlanır. Bu sindromdan əziyyət çəkənlər buz, torpaq və ya nişasta kimi yeyilməyən maddələrə qarşı meyil hiss edirlər. Bu hal bədəndəki mineral balansının pozulmasından xəbər verir. Mütəxəssislər bildirirlər ki, əgər bu əlamətlərdən bir neçəsi müşahidə edilirsə, qan analizi vermək vacibdir. Dəmir çatışmazlığının səbəbi həm sadəcə pis qidalanma, həm də daxili xəstəliklərlə bağlı ola bilər. Müalicə zamanı həkimlər dəmir tərkibli qidalar (qırmızı ət, qaraciyər, ispanaq, paxlalılar) və lazım gələrsə, əlavə preparatlar təyin edirlər.