Vətəndaşlar İTS çərçivəsində aldıqları tibbi xidmətləri qiymətləndirə biləcəklər - Şöbə müdiri

İcbari tibbi sığorta (İTS) ölkə əhalisinin sağlamlığının qorunması, tibbi xidmətlərin keyfiyyətinin yüksəldilməsi və sağlam həyat tərzinin təşviqi istiqamətində işləri davam etdirir. Bu məsələlər və rəqəmsal səhiyyədəki yeniliklər barədə İcbari Tibbi Sığorta üzrə Dövlət Agentliyinin (Agentlik) marketinq və tədbirlər şöbəsinin müdiri Pərvin Salahova məlumat verib. O, bu açıqlamanı 27-ci Azərbaycan Beynəlxalq Tibb İnnovasiyaları Sərgisi - "Medinex 2025"də edib. Şöbə müdiri bildirib ki, rəqəmsal səhiyyə sahəsində həyata keçirilən ən vacib layihələrdən biri "E-Təbib" mobil tətbiqidir. Bu tətbiq daima yenilənir və hər il yeni funksiyalarla zənginləşdirilir.

Ən son yenilənmiş xidmət vətəndaşlara İcbari tibbi sığorta çərçivəsində aldıqları tibbi xidmətləri dəyərləndirməyə imkan verir. Artıq insanlar istifadə etdikləri tibb müəssisəsini, həkimi və ümumilikdə göstərilən xidmətin keyfiyyətini mobil tətbiq üzərindən qiymətləndirə bilərlər. Vətəndaş məmnuniyyətini ölçmək üçün yaradılan bu mexanizm səhiyyə sisteminin şəffaflığını artırır və rəylərin birbaşa əlaqə vasitəsi kimi istifadəsinə şərait yaradır. Bu cür geri bildirimlər xidmətlərin necə qəbul edildiyini aydın göstərir.

Bu yeni qiymətləndirmə sistemi Tibbi Ərazi Bölmələrini İdarəetmə Birliyinə (TƏBİB) çox kömək edəcək. TƏBİB bunun sayəsində vətəndaş məmnuniyyətini yaxından izləyə biləcək. Beləliklə, qurum tibbi xidmətlərin keyfiyyətini artırmaq üçün lazım olan konkret addımları daha dəqiq müəyyənləşdirə bilir. Hansı xidmətlərin və ya müəssisələrin vətəndaşlar tərəfindən bəyənildiyi və ya narazılıq doğurduğu barədə toplanan məlumatlar əsasında daha məqsədyönlü qərarlar veriləcək. Bu yeni funksiya İTS çərçivəsində fəaliyyətin tənzimlənməsində və inkişaf etdirilməsində mühüm rol oynayır.