“Vətəndaş Hüquqları” İnstitutunun rəhbəri 148 min manatlıq qrantı mənimsəməkdə ittiham olunur

Bakı Ağır Cinayətlər Məhkəməsində “Vətəndaş Hüquqları” İnstitutunun rəhbəri Bəşir Süleymanlının cinayət işi üzrə növbəti məhkəmə prosesi keçirildi. Hakim Vüqar Seyidovun sədrliyi ilə baş tutan iclasda dövlət ittihamçısı Vüsal Mehralıyev ittiham aktını elan etdi. İttihama görə, Bəşir Süleymanlı ABŞ-ın Alman Marşal Fondundan və digər fondlardan sosial məzmunlu layihələr keçirmək adı altında ayrılan ümumilikdə 148 min manatdan artıq vəsaiti mənimsəyib. O, bu əməlləri törədərkən Mehriban Rəhimli və başqaları ilə cinayət əlaqəsinə girib. Süleymanlı, həmçinin, vəzifə səlahiyyətlərindən sui-istifadə edib və aldığı qrantlar barədə müvafiq nazirliklərə məlumat verməyib. Bəşir Süleymanlı elan olunmuş bu ağır ittiham üzrə özünü təqsirli bilmədiyini söylədi.

Məlumata görə, Bəşir Süleymanlı bu ilin mart ayında saxlanılıb. Onun barəsində Binəqədi Rayon Məhkəməsinin qərarı ilə həbs qətimkan tədbiri seçilib. Süleymanlı Cinayət Məcəlləsinin bir sıra maddələri ilə təqsirləndirilir. Bunlara 313-cü (Vəzifə saxtakarlığı), 193-1.3.2-ci (Xeyli miqdarda cinayət yolu ilə əldə edilmiş pul vəsaitlərini leqallaşdırma), və 308.2-ci (Vəzifə səlahiyyətlərindən sui-istifadə) maddələri daxildir. Proses zamanı Mehriban Rəhimlinin cinayət işinin ayrı icraata verildiyi və hazırda onunla bağlı ilkin istintaqın davam etdiyi də məlum oldu. Növbəti məhkəmə iclası noyabrın 20-nə təyin edilib.

Süleymanlının işi Azərbaycanda fəaliyyət göstərən bir sıra qeyri-hökumət təşkilatları (QHT) ilə bağlı Baş Prokurorluğun İstintaq İdarəsində başlanan daha geniş cinayət işinin bir hissəsidir. Bu iş Cinayət Məcəlləsinin 192.2.2, 213.1, 308.2 və digər maddələri ilə başlanıb. İstintaq qanun pozuntularını, həmçinin xarici QHT-lərin filiallarının və nümayəndəliklərinin fəaliyyətlərindəki pozuntuları araşdırır. Bu istintaq çərçivəsində “İştirak Evi” MMC-nin təsisçisi və direktoru Məmməd Alpay (Məmmədzadə) və Sosial Hüquqlar Mərkəzinin rəhbəri Sübhan Həsənli də daxil olmaqla bir çox şəxs təqsirləndirilən qismində cəlb edilib. Onlar 193-1.3.2, 308.2 və 313-cü maddələrlə ittiham olunurlar.

Məmməd Alpay (Məmmədzadə) və Bəşir Süleymanlı barəsində Binəqədi Rayon Məhkəməsinin qərarı ilə həbs qətimkan tədbiri seçilib. Lakin Sübhan Həsənli istintaqdan yayındığı üçün barəsində axtarış elan edilib. “Hüquq və İnkişaf” İctimai Birliyinin rəhbəri Hafiz Həsənov da bu cinayət işi üzrə təqsirləndirilən şəxs kimi tanınıb; onun barəsində isə ev dustaqlığı qətimkan tədbiri seçilib. Daha sonra iş üzrə Gəncə Regional İcma Mərkəzinin rəhbəri Asəf Əhmədov, sosial işçi Zamin Zəki və Əhməd Abbas oğlu Məmmədzadə də həbs edilib. QHT-lər ilə bağlı bu geniş araşdırmalar davam edir.