Vətəndaş cəmiyyəti təmsilçiləri SOCAR-ın Karbamid zavoduna səfər edib

Azərbaycan Dövlət Neft Şirkəti (SOCAR) və Qeyri-Hökumət Təşkilatlarına Dövlət Dəstəyi Agentliyi birgə Karbamid zavoduna səfər təşkil etdi. Bu səfər vətəndaş cəmiyyəti təmsilçilərinin müəssisənin fəaliyyəti haqqında birbaşa məlumat alması məqsədi daşıyırdı. Qeyri-hökumət təşkilatları nümayəndələrinin iştirakı ilə zavodun akt zalında görüş keçirildi.

Görüş Dövlət Himninin səsləndirilməsi ilə başladı. Daha sonra ölkəmizin ərazi bütövlüyü uğrunda canından keçmiş qəhrəman Vətən övladlarının əziz xatirəsi bir dəqiqəlik sükutla yad edildi. Belə ənənəvi səfərlər və görüşlər vətəndaş cəmiyyəti təmsilçilərinin SOCAR-ın geniş fəaliyyəti barədə məlumatlandırılması baxımından böyük əhəmiyyət daşıyır.

Tədbirdə Karbamid zavodunun direktoru Kutay Durna, Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva və SOCAR-ın Sosial Məsuliyyət Departamenti rəisi Əsəd Məmmədov çıxış etdilər. Çıxışlarda Karbamid zavodunun Azərbaycanın qeyri-neft sektorunun ən uğurlu layihələrindən biri olduğu vurğulandı. Zavodun təməli 2011-ci ildə Azərbaycan Prezidenti İlham Əliyev tərəfindən qoyulmuş, 2019-cu ildə isə dövlət başçısının iştirakı ilə açılışı olmuşdu. Qonaqlara müəssisənin işi, istehsal prosesləri və ekoloji təhlükəsizlik standartları haqqında ətraflı məlumat verildi. Agentliklə SOCAR arasında qurulan səmərəli əməkdaşlıq əlaqələri də xüsusi qeyd olundu.

Daha sonra zavodun istehsalat üzrə direktoru Şöhrət Mirzəyev müəssisənin fəaliyyəti və əldə etdiyi nailiyyətlər haqqında geniş təqdimatla çıxış etdi. Təqdimat bitdikdən sonra vətəndaş cəmiyyəti təmsilçiləri üçün Karbamid zavodunun ərazisinə tur təşkil edildi. Bu tur iştirakçılara istehsal sahəsini yaxından görməyə imkan yaratdı.

Tədbir çərçivəsində QHT nümayəndələrinin iştirakı ilə zavodun ərazisində ağacəkmə aksiyası da keçirildi. Sonda bütün iştirakçılar birgə ailə fotosu çəkdirdilər.