Tramp: Malayziya Tailand və Kamboca arasında atəşkəs üçün müşahidəçilər göndərəcək

ABŞ Prezidenti Donald Tramp Malayziyanın və digər Asiya ölkələrinin Tailandla Kamboca arasındakı atəşkəsi izləmək üçün müşahidəçilər göndərəcəyini açıqlayıb. O, bu bəyanatı Cənub-Şərqi Asiya Dövlətləri Assosiasiyasının (ASEAN sammiti) çərçivəsində birgə bəyannamə imzalayarkən verib. İmzalama mərasimində Kamboca və Tailandın hökumət başçıları, eləcə də Malayziyanın Baş naziri Ənvər İbrahim iştirak edirdi.

Tramp qeyd etdi ki, sülhün davamlı olmasını təmin etmək üçün Malayziya da daxil olmaqla Asiya ölkələrindən müşahidəçilər yerləşdiriləcək. O, vurğulayıb ki, çoxlarının işlək olmayan hesab etdiyi bu sülh müqaviləsi milyonlarla insanın həyatını xilas edəcək.

Prezident həmçinin bu müqavilənin bir hissəsi olaraq 18 Kamboca əsirinin azad olunacağını elan etdi.