"Rockstar Games" Böyük Britaniya və Kanadada 40 işçisini işdən çıxarıb

"Rockstar Games" oyun şirkəti Böyük Britaniya və Kanada ofislərində çalışan təxminən 40 əməkdaşını işdən azad etdi. Bu kütləvi ixtisar böyük oyun studiyasında yaranan daxili gərginlik fonunda baş verir. "Bloomberg" agentliyinin yaydığı məlumata görə, işdən çıxarılanların hamısı şirkətin qapalı "Discord" qrupuna üzv olublar. Şirkət hazırda gələn ilin may ayında buraxılması planlaşdırılan “GTA 6” oyununun təqdimatına hazırlaşarkən ciddi daxili təzyiqlərlə üzləşir.

İşdən çıxarılmaların əsas səbəbi həmkarlar ittifaqı yaratmaq cəhdləri ilə bağlıdır. Böyük Britaniyanın Müstəqil İşçiləri Təşkilatının (IWGB) məlumatı göstərir ki, bəzi əməkdaşlar şirkət daxilində birləşməyə çalışırdılar. IWGB bu hadisəni sərt şəkildə tənqid etdi və ixtisarları "Britaniya oyun sənayesi tarixində həmkarlar ittifaqının ən sərt şəkildə sıxışdırılması" kimi qiymətləndirdi. Təşkilat qeyd edir ki, Rockstar həmkarlar ittifaqı fəaliyyəti ilə məşğul olan və ya bu fəaliyyəti dəstəkləyən 30-dan çox işçini ədalətsiz şəkildə işdən çıxardı.

Bu ixtisarlar studiya rəhbərliyi ilə işçilər arasında münasibətlərin kəskinləşdiyini göstərir. IWGB dərhal addım atılmasını tələb edir. Onlar verdikləri bəyanatda geri çəkilməyəcəklərini və işdən çıxarılanların hamısının vəzifələrinə bərpa olunmasını tələb etdiklərini bildiriblər. Bu daxili münaqişə “GTA 6”nın gözlənilən təqdimatı ərəfəsində Rockstar Games daxilindəki vəziyyətin nə qədər həssas olduğunu ortaya qoyur.