"Qarabağ"ın Çempionlar Liqasındakı rəqibinin əsas futbolçularından biri zədələnib

UEFA Çempionlar Liqası əsas mərhələsində "Qarabağ"ın rəqibi olan İtaliyanın "Napoli" klubunda gözlənilməz və ciddi itki yaşanıb. Komandanın aparıcı futbolçularından biri kimi göstərilən Kevin De Brüyne zədə səbəbindən sıradan çıxıb. Bu hadisə həm "Napoli"nin liqa mübarizəsinə, həm də qarşıda duran Çempionlar Liqası oyunlarına, xüsusilə də "Qarabağ"la keçiriləcək matça təsir edəcək.

De Brüyne A Seriyasının VIII turunda "İnter"ə qarşı keçirilən və "Napoli"nin 3:1 hesablı qələbəsi ilə bitən oyunda zədələnib. 33 yaşlı belçikalı yarımmüdafiəçi matçın 33-cü dəqiqəsində penalti zərbəsi ilə hesabı açmışdı. Təəssüf ki, futbolçu məhz həmin an zədələnərək oyuna davam edə bilməyib. Klubdan verilən məlumata görə, De Brüyne yaşıl meydanlardan ən azı 3-4 ay kənar qalacaq. Bu, onun ilin sonuna qədər və gələn ilin əvvəlində komandaya kömək edə bilməyəcəyi deməkdir.

34 yaşlı De Brüyne cari mövsüm "Napoli"nin hücum xəttində əsas simalardan biri idi. O, indiyədək komandanın heyətində 11 oyun keçirib, 4 qol vurub və 2 məhsuldar ötürmə edib. Aparıcı oyunçunun belə uzun müddətə sıradan çıxması "Napoli"nin gücünə mənfi təsir göstərəcək. "Napoli" və "Qarabağ"ın Çempionlar Liqası qarşılaşması noyabrın 26-da, gecə saat 00:00-da baş tutacaq.