Messi Argentina və Barselona barədə xatirələrini bölüşüb

ABŞ-nin "İnter Mayami" futbol komandasının hücumçusu Lionel Messi, Argentinadakı uşaqlıq illəri və İspaniyaya köçməsi barədə şəxsi xatirələrini bölüşüb. O, "NBC News"a verdiyi müsahibədə həyatının iki əsas mərhələsi haqqında açıq danışdı. Hazırda MLS-də çıxış edən ulduz futbolçu, Argentinanın onun həyatında oynadığı mənəvi rolu və gənc yaşda Barselonaya adaptasiya prosesinin çətinliklərini izah edib.

Bu söhbət Messi üçün evin, yəni Argentinanın nə qədər dəyərli olduğunu bir daha göstərir. O, uşaqlıqdan bəri həyatı və dəyərləri məhz orada, evdə öyrəndiyini vurğulayıb. "Argentina uşaqlıqdan bəri mənim üçün hər şey olub. Həyatda hər şeyi orada, evdə öyrəndim," deyən futbolçu, ailəsinin tərbiyəsinin onun üçün ən vacib miras olduğunu bildirib. O, valideynlərindən aldığı dəyərləri və lap əvvəldən ailəsi ilə bağlı olan tərbiyəni xatırlayıb. Bu, onun şəxsi xarakterinin və peşəkar futbol karyerasının əsasını qoyan dövr idi.

Messi gənc yaşda Barselonaya köçməyin çətinlikləri barədə də danışıb. O, yeni ölkəyə tək getməyə məcbur qalıb və heç kimi tanımadığı bir yerdə sıfırdan başlamaq lazım gəlib. O, bütün bu çətin təcrübəni zaman keçdikcə yeni həyatına daşıdığını və buna adaptasiya olduğunu qeyd edib. Bu gün ABŞ-də çıxış etməsinə baxmayaraq, Messinin meydandakı performansı hələ də yüksəkdir. Argentinalı futbolçu cari mövsümdə MLS-in ən çox qol vuran oyunçusu adını qazanıb. O, 28 matçda ümumilikdə 29 qol vurub və komandasına əlavə olaraq 19 məhsuldar ötürmə edib. Bu rəqəmlər onun dünyanın ən yaxşı oyunçularından biri olaraq qalmaqda davam etdiyini təsdiqləyir.