"Mançester Yunayted" kamerunlu hücumçunu transfer etmək istəyir

İngiltərə Premyer Liqasının nəhəng klubu “Mançester Yunayted” İspaniyadan hücumçu transfer etməyə hazırlaşır. Xarici KİV-lərin yaydığı xəbərə görə, “Levante” klubunun forvardı Karl Etta Eyonq karyerasını məhz İngiltərədə davam etdirə bilər.

“Qırmızı İblislər” kamerunlu futbolçunu heyətlərinə qatmaqda maraqlıdırlar. Bu transfer Eyonq üçün böyük sıçrayış ola bilər. Lakin, transferin baş tutması üçün Mançester klubunun böyük məbləği ödəməsi lazım gələcək. Karl Etta Eyonqun müqaviləsindəki sərbəstqalma maddəsi hansı liqaya keçid ediləcəyinə görə fərqli qiymətləndirilir.

Məlumatlara görə, əgər futbolçu İspaniya daxilində başqa kluba transfer olunarsa, bu məbləğ 30 milyon avro təşkil edir. Lakin İngiltərə klubları üçün sərbəstqalma dəyəri daha yüksəkdir - bu, 40 milyon avrodur. Bu rəqəm "Mançester Yunayted"in bu yay transfer bazarında kifayət qədər ciddi xərclərə hazır olduğunu göstərir.

Maraqlıdır ki, “Levante” klubu Karl Etta Eyonqu mövsümün əvvəlində cəmi 3 milyon avroya transfer edib. O, o zaman “Vilyarreal”dan alınmışdı. Əgər “Mançester Yunayted” tələb olunan 40 milyon avronu ödəyərsə, bu, “Levante” klubu üçün çox qısa müddətdə əldə edilən böyük bir qazanc olacaq. Kamerunlu hücumçunun Premyer Liqaya keçidinin reallaşıb-reallaşmayacağı yaxın günlərdə bəlli olacaq.