HƏMAS iki israilli əsirin meyitini qaytarıb - YENİLƏNİB

HƏMAS hərəkatının nümayəndələri iki israilli əsirin cəsədinin qalıqlarını Beynəlxalq Qırmızı Xaç Komitəsinin (BQXK) əməkdaşlarına təhvil verib. Bu hərəkət oktyabrın 10-da Qəzza zolağında qüvvəyə minən atəşkəs razılaşmasının birinci mərhələsinin bir hissəsidir. Təhvil verilmə prosesi Qəzza zolağında baş tutub və cəsədlərin qalıqları BQXK vasitəsilə israilli hərbçilərə çatdırılmaq üzrə yola salınıb. İsrail Müdafiə Qüvvələri (IDF) və "Şin Bet" təhlükəsizlik xidməti bu barədə yayılan məlumatı rəsmi olaraq təsdiqləyib.

Əvvəlcə, HƏMAS-ın hərbi qanadı olan "İzzəddin əl-Qəssam Briqadaları" yaxın saatlarda iki əsirin meyitini İsrailə təhvil verəcəyini bəyan etmişdi. Bu bəyanatdan sonra İsrail ordusu cəsədləri qəbul etmək üçün Qırmızı Xaç nümayəndələrinin artıq yola düşdüyünü təsdiqlədi. Meyitlərin təhvil verilməsi Qəzza vaxtı ilə saat 16:00-a planlaşdırılmışdı. Qalıqların olduğu iki tabut BQXK-ya təqdim edilib və tezliklə İsrail tərəfinə çatdırılacaq.

İsrailin Baş naziri Binyamin Netanyahu bu hadisə ilə bağlı ölkəsinin mövqeyini açıqladı. O, İsrailin bütün girovları və həlak olan israillilərin qalıqlarını geri qaytarmaqda qərarlı olduğunu bildirdi. Netanyahu həmçinin Qəzza zolağının gələcəyi barədə sərt xəbərdarlıq etdi. O qeyd edib ki, yekunda HƏMAS silahsızlaşdırılacaq, Qəzza isə hərbsizləşdiriləcək. Baş nazir vurğulayıb ki, xarici qüvvələr bunu etsələr yaxşı olar, lakin etmədikləri halda İsrail bu addımı özü atacaq.